"რა სამწუხარო სანახავია პოლიტიკას და ოპოზიციონერის სტატუსს შეფარებული ზოგიერთი უსაქმური, რომელმაც ახლა, ამ დროს საბრძოლო ფრონტი გახსნა მთავრობის წინააღმდეგ", — ასე ეხმაურება ფეისბუქგვერდზე პარლამენტის რეგიონული პოლიტიკისა და თვითმმართველობის კომიტეტის თავმჯდომარე ზაზა გაბუნია ოპოზიციის მხრიდან ხელისუფლების კრიტიკას. მისი თქმით, ოპოზოციაში არ ერიდებიან ცილისმწამებლურ განცხადებებს და "ქედმაღლურად გასცემენ, უსარგებლო დირექტივებს".

"კორონავირუსით გამოწვეულ კრიზისთან გამკლავების მიზნით, ქვეყნის ხელისუფლება, ქართული ოცნების გუნდი ხალხის წინაშე აღებული პასუხისმგებლობის ფარგლებში მაქსიმალური შედეგებისთვის მუშაობს და უმნიშვნელოვანესი შედეგები სახეზეა, როგორც ჯანდაცვის სტრატეგიის, ისე ეკონომიკური მხარდაჭერის პოლიტიკის, მოქალაქეთა სამშობლოში დაბრუნების და სხვა მნიშვნელოვანი საკითხების მიმართულებით", — აცხადებს გაბუნია.

გაბუნია ამბობს, რომ ეს ყველაფერი კეთდება უძილო ღამეების ფასად და არავინ ითხოვს მადლიერებას, თუმცა ხელისუფლების ძალისხმევის საილუსტრაციოდ მან ჩამოთვალა კორონავირუსის პრევენციისთვის გატარებული ღონისძიებები. მათ შორის, ეკონომიკის სტიმულირების გეგმა, ცხელების კლინიკების გახსნა, ცხელი ხაზის ამოქმედება, კომუნალურების ვაუჩერები და ა.შ.

"ეს პასუხისმგებლიანი და ხალხის ინტერესების დამცველი ხელისუფლების ბუნებრივი ვალდებულებაა, მაგრამ არც იმ უპასუხისმგებლო იპოზიციონერი პოლიტიკოსების წუწუნს და ვაიკრიტიკას მივიღებთ", — აცხადებს ის.

ოპოზიციასა და მმართველ გუნდს შორის პოლიტიკური განხივლის თემად ჯერ სწრაფი ტესტების ქვეყანაში შემოტანა, შემდეგ კი მოქალაქეების ქვეყანაში დაბრუნების საკითხი გახდა. კერძოდ, ნაციონალურმა მოძრაობამ განაცხადა, რომ შეუძლია საქართველოს მოქალაქეების დასაბრუნებლად ავიარეისები უზრუნველყოს, რაზეც პასუხად უარი მიიღო.

გიორგი გახარიამ აღნიშნა, რომ ევროპის სხვადასხვა ქალაქიდან საქართველოს მოქალაქეების ჩამოყვანაში ქვეყანას დახმარება არ სჭირდება და თუ ვინმეს შესაძლებლობა აქვს, ფული ფონდში ჩარიცხოს. მისი თქმით, ამ თემაზე რამდენიმე კვირაა მხოლოდ ჭორაობენ.

ექსპრეზიდენტი მიხეილ სააკაშვილი გახარიას პასუხად აცხადებს, რომ ფონდში ფული შეუძლია "ბუნკერში ჩამალულმა უფროსმა" ბიძინა ივანიშვილმა გადაურიცხოს. სააკაშვილის თქმით, მთავრობისგან მხოლოდ 2 რამეს ითხოვენ, რომ მიმართონ საელჩოებს წერილით, რათა გაიხსნას აეროპორტები და შემდეგ ამ რეისმა თბილისში დაჯდომა მოახერხოს.