ექსპრეზიდენტი მიხეილ სააკაშვილი საქართველოს პრემიერ-მინისტრს, გიორგი გახარიას პასუხობს და ამბობს, რომ ფონდში ფული შეუძლია "ბუნკერში ჩამალულმა უფროსმა" ბიძინა ივანიშვილმა გადაურიცხოს. ამ თემაზე მიხეილ სააკაშვილმა სპეციალური ვიდეო მიმართვა გაავრცელა.

სააკაშვილის თქმით, მთავრობისგან მხოლოდ 2 რამეს ითხოვენ, რომ მიმართონ საელჩოებს წერილით, რათა გაიხსნას აეროპორტები და შემდეგ ამ რეისმა თბილისში დაჯდომა მოახერხოს.

"ამას ხომ არაფერი ჰქვია გარდა ბანალური გადაგდებისა. მათ გვითხრეს, რომ ფული გადმოგვირიცხონ და ჩვენ თვითონ ჩამოვიყვანთო. მე ვერ ვაკადრებ ჩვენს მეგობრებს მთელს მსოფლიოში ვინც გვეხმარება, რომ ახლა თურმე ივანიშვილს უნდა გადავურიცხოთ კიდევ მათი ფული. მათ გადმორიცხეს ფული იმისთვის, რომ ჩვენი ხალხი დავაბრუნოთ საქართველოში", — თქვა მიხეილ სააკაშვილმა.

ყოფილმა პრეზიდენტმა ხელისუფლებას მოუწოდა, რომ "ახალ ლაყბობის დრო არ არის —საქმე ლაპარაკის ნაცვლად!" ნაციონალური მოძრაობის შეთავაზებასთან დაკავშირებით დღეს, 4 აპრილს გიორგი გახარიამ აღნიშნა, რომ რეისის ორგანიზება უმარტივესია და თუ ამის "თავი არ აქვთ", შეუძლიათ ფული სპეციალურ ფონდში გადარიცხონ.

მისი თქმით, ამ თემაზე რამდენიმე კვირაა მხოლოდ ჭორაობენ.

ერთიანი ნაციონალური მოძრაობა საქართველოს ხელისუფლებას ევროპის ქალაქებში ჩარჩენილი მოქალაქეები ჩამოყვანაში დახმარებას სთავაზობს. პარტიის ინფორმაციით, დაახლოებით 1 000 მოქალაქის უფასოდ გადმოყვანის რესურსი აქვთ, თუ მთავრობა ხელს შეუწყობს. საუბარია ოთხ ფრენაზე ევროპის სხვადასხვა ქალაქიდან: ვარშავა, კიევი, ბერლინი, რომი, ბარსელონა. ამ თემაზე გიორგი გახარიამ აღნიშნა, რომ ევროპის სხვადასხვა ქალაქიდან საქართველოს მოქალაქეების ჩამოყვანაში ქვეყანას დახმარება არ სჭირდება.