თავდაცვის სამინისტროს განცხადებით, ლუგარის ლაბორატორიიდან მიღებული ანალიზის პასუხების მიხედვით, სამხედრო მოსამსახურეებს კორონავირუსი არ უდასტურდებათ. მათივე მტკიცებით, დღემდე არც ერთ სამხედრო მოსამსახურეს კორონავირუსი არ დადასტურებია, ასევე არ დასტურდება ერთი სამხედროს პნევმონიის დიაგნოზიც.

"ვინაიდან სამინისტროს გადაწყვეტილებით კორონავირუსისთვის ან სეზონური გრიპისთვის დამახასიათებელი ნიშნების მქონე ყველა სამხედრო მოსამსახურე მკურნალობის კურსს სამხედრო ჰოსპიტალში გადის, გუშინ თბილისის პირველ საუნივერსიტეტო კლინიკაში მოთავსებული ხუთი სამხედრო მოსამსახურე სამხედრო ჰოსპიტალში გადაიყვანეს", — წერია განცხადებაში.

26 მარტს საუნივერსიტეტო კლინიკის ექიმმა განაცხადა, რომ ოთხ სამხედროს ტემპერატურა აღარ ჰქონდა და მათი მდგომარეობაო დამაკმაყოფილებელი იყო, მეხუთეს კი პნევმონია აღმოაჩნდა, ამიტომ სხვა პალატაში გადაიყვანეს. ექიმის ცნობითვე, ისინი მანამდე საკარანტინო სივრცეში არ იყვნენ და პატრულირებდნენ, რის შემდეგაც დაეწყოთ ტემპერატურა.

ამ ფაქტს გამოეხმაურა თავდაცვის სამინისტროც და განაცხადა, რომ ჯარში, სპეციალური ჯგუფები ცალკეულ სადეზინფექციო სამუშაოებს აქტიურად ატარებენ და სამხედრო პერსონალის ჯანმრთელობის მდგომარეობას მუდმივად ამოწმებენ.