საქართველოს კინემატოგრაფიის ეროვნული ცენტრი თვითიზოლაციის შესამსუბუქებლად ქართველ მაყურებლებს ახალ წამოწყებას სთავაზობს: ქართველი რეჟისორების ფილმები ინტერნეტსივრცეში განთავსდება და მათი ნახვა ნებისმიერ მსურველს უფასოდ შეეძლება.

კინოცენტრი თავის ფეისბუქის ოფიციალურ გვერდზე ეტაპობრივად გამოაქვეყნებს სხვადასხვა ფილმის ონლაინ პრემიერის თარიღს. პირველად გაგა ბაინდურაშვილის ფილმის გაბანას ონლაინ ჩვენება შედგება 25 მარტს, 19:00 საათზე.

ამ წამოწყებას არაერთი ქართველი კინოხელოვანი შეურთდა და მათი ფილმების ნახვა უკვე შეგიძლიათ ონლაინ. მათ შორისაა გიგა ლიკლიკაძის სადებიუტო ნამუშევარი ღორი

და ლაშა ცქვიტინიძის მე ვარ ბესო.

ეროვნული კინოცენტრის განცხადებით, ქართველ რეჟისორებთან და პროდიუსერებთან ერთად ყველაფერს იღონებენ, "რათა ქვეყანაში არსებული საგანგებო მდგომარეობის პერიოდში მეტი ქართული ფილმი გახდეს მაყურებლისთვის ხელმისაწვდომი და სულ ცოტათი მაინც შევამსუბუქოთ თვითიზოლაციაში მყოფი ჩვენი თანამემამულეების ყოფა".