დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოს პარლამენტის თავმჯდომარე მიიჩნევს, რომ ეკლესიამ სწორი პოზიცია დაიკავა, რადგან მრევლს მოუწოდა დაიცვან ჯანდაცვის მსოფლიო ორგანიზაციის რეკომენდაციები.

არჩილ თალაკვაძის თქმით, ოპონენტებს უნდოდათ ისე წარმოჩენილიყო, თითქოს რელიგიური ორგანიზაციები, საზოგადოება და ხელისუფლება სხვადასხვა მხარეს არიან.

"როგორც ნახეთ, ეკლესიამ ძალიან სწორი პოზიცია დაიკავა, მათ მოუწოდეს მრევლს, რომ დაიცვან ჯანდაცვის სამსახურების მიერ გაცემული რეკომენდაციები და მე დარწმუნებული ვარ, რომ მომავალში, თუ ჩვენ მოგვიწევს უფრო მკაცრი შეზღუდვების დაწესება, სამღვდელოება, სასულიერო პირები გააკეთებენ ყველაფერს იმისთვის, რომ აუხსნან მრევლს, მოქალაქეებს, რომ ჯანდაცვა, ჯანმრთელობის და სიცოცხლის დაცვა და ამ მიზნით გადადგმული ნაბიჯები არანაირად არ მოდის წინააღმდეგობაში რწმენის საკითხთან", — თქვა თალაკვაძემ ტელეკომპანია იმედის ეთერში.

მან ასევე აღნიშნა, რომ ყველას, როგორც მოქალაქეებს და ხელისუფლებას, ისე ადამიანებს, "ვისი მაგალითიც არის მისაბაძი", აქვთ საერთო პოზიცია.

"წარმოუდგენლად მეჩვენება, რომ სახელმწიფოს რომელიმე მნიშვნელოვანი ნაწილი დადგეს განსხვავებულ მხარეს, როდესაც საქმე ეხება მოქალაქეების სიცოცხლეს და ჯანმრთელობას", - თქვა თალაკვაძემ.

მიუხედავად იმისა, რომ საქართველოში კორონავირუსის გამო საგანგებო მდგომარეობა გამოცხადდა და დეკრეტით 10-ზე მეტი ადამიანის ერთ სივრცეში შეკრება აიკრძალა, ეკლესიებში წირვა მაინც ჩატარდა. ზოგიერთ მათგანში მრევლს აუცილებელი დისტანციის დაცვისკენ მოუწოდებდნენ და ხატებს სპეციალური სითხით ამუშავებდნენ, თუმცა სასულიერო პირებმაც აღიარეს, რომ წირვის შემდეგ მრევლი დისტანციას აღარ იცავდა. ამასთან, სხვადასხვა მედიაში გავრცელდა ფოტო და ვიდეო მასალა, სადაც ჩანს, რომ ეკლესიაში არიან არასრულწლოვნები, ასევე, ორსულები.

წირვის ჩატარებამდე ერთი დღით ადრე, მას შემდეგ, რაც ქვეყანაში საგანგებო მდგომარეობა გამოცხადდა, სწორედ არჩილ თალაკვაძემ თქვა, რომ დეკრეტში რწმენისა და აღმსარებლობის უფლებასთან დაკავშირებით შეზღუდვები არ არის. პარლამენტის თავმჯდომარეს რამდენჯერმე დაუსვეს კითხვა, რა ხდებოდა იმ შემთხვევაში, თუ ტაძარში ათზე მეტი ადამიანი შეიკრიბებოდა და გავრცელდებოდა თუ არა მათზე საგანგებო მდგომარეობის შეზღუდვები. არჩილ თალაკვაძე ყოველ ჯერზე პასუხობდა, რომ რწმენისა და აღმსარებლობის უფლების შეზღუდვაზე დეკრეტში საუბარი არაა.

პრემიერმინისტრმა გიორგი გახარიამ, ვინც საგანგებო მდგომარეობის გამოცხადება მოითხოვა, ბრიფინგის დროს ეკლესიის შესახებ კითხვის პასუხად კი თქვა, რომ "შეკრების შეზღუდვა ეხება ყველას და ყველაფერს".

კარანტინი ორ რაიონში და საგანგებო მდგომარეობა ქვეყანაში: ახალი შეზღუდვები და რეკომენდაციები

ბოლო მონაცემებით, საქართველოში კორონავირუსით ინფიცირების 61 შემთხვევაა დაფიქსირებული, აქედან გამოჯანმრთელდა 8 პაციენტი. კარანტინში მოთავსებულია 3 320 ადამიანი, სტაციონარში მეთვალყურეობის ქვეშ კი 235.

კორონავირუსის გავრცელების გამო ქვეყანაში საგანგებო მდგომარეობაა გამოცხადებული და სხვადასხვა აკრძალვებია დაწესებული, მათ შორის აკრძალულია 10-ზე მეტი ადამიანის შეკრება.

• რა შეზღუდვებს ითვლისწინებს საგანგებო მდგომარეობა

მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყვეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ჯანდაცვის სამინისტროს დაევალა, მარნეულსა და ბოლნისში დაიწყოს ტესტირების სპეციალური პროგრამა. ჯანდაცვის მინისტრის თქმით, სწრაფი ტესტები ქვეყანაში ხვალიდან შემოვა.

გარდა ამისა, მთავრობის გადაწყვეტილებით, საქალაქთაშორისო გადაადგილება აიკრძალა ყველა სახის ტრანსპორტით, გარდა პირადი ავტომობილებისა. თბილისის მერიის გადაწყვეტილებით კი შეზღუდვები დაწესდა ტაქსებზე. კერძოდ, მხოლოდ 2 მგზავრის გადაყვანა შეიძლება უკანა სავარძლებზე და ფანჯრები უნდა იყოს ღია.

დღეს, 23 მარტს ცნობილი გახდა, რომ მთავრობის განკარგულებით, საქართველოს ავიახაზები 2 კვირის განმავლობაში მსოფლიოს 6 ქალაქიდან ჩამოიყვანს მგზავრებს. მთავრობის მოთხოვნით, ბილეთის ფასი არ უნდა აღემატებოდეს €199-ს.

• ნახეთ ფრენების განრიგი

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა. კერძოდ:

• მუშაობა შეწყვიტა ყველა სავაჭრო ობიექტმა სასურსათო მაღაზიების, სააფთიაქო და საფოსტო ქსელების, ბენზინგასამართი სადგურებისა და ბანკების გარდა;
• აიკრძალა სამარშრუტო ტაქსების გადაადგილება;
• საზღვარი დაკეტილია ყველა უცხო ქვეყნის მოქალაქისთვის;
• საჰაერო მიმოსვლა შეწყდა ყველა კომპანიისთვის საქართველოს ავიახაზების გარდა;
• ყველას, ვინც საქართველოს საზღვარს გადმოკვეთს, კარანტინში გაუშვებენ;
• საჯარო დაწესებულებების ნაწილმა, მათ შორის, შსს-ს მომსახურების სააგენტომ და იუსტიციის სახლმა მომსახურებები შეზღუდა;

გარდა ამისა, როგორც კერძო, ისე საჯარო სექტორს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე:

• აუცილებელი რეკომენდაციები კორონავირუსისგან თავის დასაცავად
• რეკომენდაციები თვითიზოლაციაში მყოფი პირებისთვის
• რეკომენდაციები კარანტინში მყოფებისთვის
• როგორ უნდა გაიკეთოთ, გამოიყენოთ და გადააგდოთ ნიღაბი
• როგორ დავიბანოთ ხელები სწორად კორონავირუსისგან დასაცავად.