კალიფორნიის ქალაქ აზუსაში, რომელიც ლოს-ანჯელესიდან დაახლოებით 50 კილომეტრში მდებარეობს, 2 სხვადასხვა საარჩევნო უბნის მიმდებარე ტერიტორიაზე სროლების ხმა ისმოდა.

CNN-ის უკანასკნელი ცნობით, დაღუპულია 1 და დაჭრილია 3 ადამიანი. ლოს-ანჯელესის პოლიციის თანამშრომლის თქმით, დაჭრილები საავადმყოფოში გადაიყვანეს, თუმცა ერთ-ერთი მათგანი მალევე გარდაიცვალა.

CNN მოწმეზე დაყრდნობით იუწყება, რომ სროლა საარჩევნო უბნის გარეთ დაიწყო, რის შემდეგაც მოქალაქეების ტალღა საარჩევნო უბანს მიაწყდა. ისინი შენობაში შერბოდნენ, მანამ, სანამ სამართალდამცავებმა კარები არ დაკეტეს.

ერთ-ერთი საარჩევნო უბანი ამ დრომდე იზოლირებულია და პოლიცია მოქალაქეებს მისი დატოვების უფლებას არ აძლევს. მოწმის თქმით, აღნიშნულ უბანზე ხმის მიცემის პროცესი არ შეწყვეტილა და შენობაში მყოფი ამომრჩეველი თავისი ხმას აფიქსირებს.

შენობაში მყოფთაგან რამდენიმე ბავშვიცაა, რომლებიც სროლას შეესწრნენ.

დამნაშავე დაკავებული ჯერ არაა. პოლიცია მოქალაქეებს შინ დარჩენისკენ მოუწოდებს. დაკეტილია სკოლები.