დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

18 მარტის მდგომარეობით:

  • 216 646 დადასტურებული შემთხვევა მსოფლიოში
  • 8 908 გარდაცვლილი
  • 84 383 გამოჯანმრთელებული

საქართველოში:

  • კორონავირუსის დადასტურებული შემთხვევა - 38
  • კარანტინის რეჟიმში - 1 344
  • სტაციონარში მეთვალყურეობის ქვეშ - 216
  • გამოჯანმრთელებული - 1

დღის ფაქტი

მსოფლიო მასშტაბით კორონავირუსით ინფიცირებულთა რაოდენობამ 200 ათასს გადააჭარბა. კორონავირუსით ინფიცირებულთა რაოდენობამ 100 ათასს 3 თვესა და 7 დღეში მიაღწია, მომდევნო 100 ათასი შემთხვევა კი 12 დღეში დაფიქსირდა.

კორონავირუსით ინფიცირებულთა რიცხვმა 100 000-ს 6 მარტს მიაღწია.

დღის მთავარი ჰედლაინი მსოფლიო მედიაში:

დიდ ბრიტანეთში სკოლები დაიხურება

ფოტო: Getty

კორონავირუსის პანდემიის საპასუხოდ დიდ ბრიტანეთში სკოლები დროებით დაიხურება. სკოლები მხოლოდ სამედიცინო მუშაკების შვილებისთვის და სოციალურად დაუცველი ბავშვებისთვის იქნება ღია.

გადაიდება დაგეგმილი გამოცდებიც ინგლისსა და უელსში. გადაწყვეტილების მიღებას წინ დამატებით 32 გარდაცვალების შემთხვევა უძღვოდა, რითაც დიდ ბრიტანეთში კორონავირუსით გარდაცვლილითა რიცხვმა 104-ს მიაღწია.

დიდ ბრიტანეთში დადასტურებული შემთხვევების რაოდენობა სამშაბათს 1950 იყო, ოთხშაბათს კი - 2626. მთავრობა გეგმავს, რომ ამიერიდან დღეში 25 000 მოქალაქე შეამოწმოს კორონავირუსზე.

ბრიტანეთმა თავდაპირველად გადაწყვიტა, რომ განსხვავებულად მისდგომოდა კორონავირუსთან ბრძოლას. სანამ ევროპაში სკოლები იხურებოდა, ხოლო კარანტინის რეჟიმს ქუჩაში შეიარაღებული ძალები იცავდნენ, ბრიტანეთის მთავრობა მოქალაქეებს ურჩევდა, რომ ჩვეულებრივად გაეგრძელებინათ ცხოვრება. სკოლები, რესტორნები, თეატრები, კლუბები და სპორტული დაწესებულებები ძველებურად ღია იყო, თვითიზოლაციის შესახებ რეკომენდაცია კი მხოლოდ 70+ ადამიანებს და გრიპის სიმპტომების მქონე პირებს შეეხოთ. ბრიტანული სტრატეგია ადგილობრივი მეცნიერების რჩევებზე იყო დამყარებული, რომელთა თქმითაც, კორონავირუსთან ბრძოლის ყველაზე ეფექტური ფორმა ვირუსისთვის გავრცელებისთვის ხელის არშეშლა იყო, რის შედეგადაც მოსახლეობა ჯოგურ იმუნიტეტს გამოიმუშავებდა.

ორშაბათს ეს თეორია რეალობას შეეჩეხა. შესაძლო მოვლენების მოდელირებამ აჩვენა, რომ "თავისუფლად მიშვების შემთხვევაში" ჰოსპიტალიზებული პაციენტების 30%-ს დასჭირდებოდა ინტენსიური თერაპიის განყოფილებაში მოთავსება, რაც ბრიტანეთის ჯანდაცვის სისტემას წყობიდან გამოიყვანდა.

რეპორტის გამოქვეყნებიდან რამდენიმე საათში ბორის ჯონსონმა განაცხადა, რომ ჯოგური იმუნიტეტის გეგმაზე უარს ამბობს. ამიერიდან ბრიტანელები სახლიდან იმუშავებენ და სოციალიზაციისაგან თავს შეიკავებენ.

დღის ფოტო: ბავარიის მინისტრი საჭმლითა და ტუალეტის ქაღალდით სავსე საწყობში პოზირებს, რომ პანიკა ჩააცხროს

დღის დამაიმედებელი ამბები

დღეს ერთდროულად 3 კარგ ამბავს გეტყვით:

1. ნიუ-იორკში მცხოვრებმა ორმა ახალგაზრდამ 72 საათში 1 300 მოხალისე შეკრიბა, რათა მოხუცებისათვის პროდუქტები მიეტანათ. მოხალისეები საკუთარ თავს "უჩინარ ხელებს" უწოდებენ და მათ მოხუცებთან არა მხოლოდ პროდუქტები, არამედ ადამიანური სითბოც მიაქვთ, რა თქმა უნდა, უსაფრთხო დისტანციის დაცვით.

2. 103 წლის ირანელი ქალი კორონავირუსისაგან გამოჯანმრთელდა. ქალი, რომლის ვინაობაც უცნობია, საავადმყოფოდან 1-კვირიანი ჰოსპიტალიზაციის შემდეგ გამოწერეს. ეს ასაკოვანი პაციენტის გამოჯანმრთელების მეორე შემთხვევაა ირანში. პირველი შემთხვევა 91 წლის კაცს ეხებოდა, რომელიც 3 დღეში გამოჯანმრთელდა.

3. იტალის 3 300-ადამიანიანი დასახლების მაგალითი აჩვენებს, რომ მასობრივი ტესტირებები ეფექტურია. ვენეციასთან განლაგებული პატარა ქალაქის უკლებლივ ყველა მაცხოვრებელმა ჩაიტარა ტესტირება, დაინფიცირებულები და მათი კონტაქტები კი მკაცრ კარანტინში მოათავსეს. ამ დასახლებაში პარასკევის შემდეგ ახალი შემთხვევები აღარ დაფიქსირებულა.

"ტესტირება გადამწყვეტი იყო, ამ მეთოდმა უამრავი სიცოცხლე იხსნა", - განაცხადა ქალაქის მერმა, ჯიულიანი მარტინიმ.

რა ხდება მსოფლიოში:

რომში კორონავირუსის მქონე პაციენტი საავადმყოფოში გადაჰყავთ

ფოტო: Alessandra Tarantino/AP

რა ხდება საქართველოში:

დღეს საქართველოში კორონავირუსის 4 ახალი შემთხვევა დადასტურდა, ლარი კი ევროსთან და დოლართან 10-10 თეთრით გაუფასურდა.

პროგნოზები:

კარგი ამბები:

ერთი ამბავი, რომელმაც დღეს გაგვაღიმა

ვიდეოები: როგორ გადაუხადა საქართველოს მოსახლეობამ მადლობა ექიმებს

დღის რჩევა:

რა არ მივიღოთ სიცხის დროს

სამშაბათს ჯანდაცვის მსოფლიო ორგანიზაციამ (WHO) გაავრცელა რეკომენდაცია, რომლის მიხედვითაც COVID-19-ის სიმპტომების მქონე ადამიანებს იბუპროფენის გამოყენებაზე უარის თქმა ურჩია. განცხადება მას შემდეგ გავრცელდა, რაც საფრანგეთმა განაცხადა, რომ ანთების საწინააღმდეგო წამლებმა კორონავირუსის სიმპტომები, შესაძლოა, უფრო გაამძაფროს.

საფრანგეთის ჯანდაცვის მინისტრმა განცხადება სამედიცინო ჟურნალ The Lancet-ში გამოქვეყნებული კვლევის შემდეგ გააკეთა, რომლის მიხედვითაც ანთების საწინააღმდეგო მედიკამენტები ერთ-ერთი ფერმენტის აქტივობას ზრდის, რომელმაც, შესაძლოა, კორონავირუსის ინფექცია გაამწვავოს. ასე რომ, იბუპროფენისა და მისი შემცველი წამლების, მაგალითად, ნუროფენის მიღება სიცხის დროს რეკომენდებული არაა.

რა მივიღოთ სიცხის დროს

"ჩვენ საკითხს ახლა უფრო დეტალურად ვიკვლევთ. მანამდე კი, საკუთარი გადაწყვეტილებით მედიკამენტის მიღებისას სჯობს იბუპროფენის ნაცვლად პარაცეტამოლი მიიღოთ — ამბობს ჯანდაცვის მსოფლიო ორგანიზაციის წარმომადგენელი ქრისტიან ლინდმეიერი.

აქვე გეტყვით, რომ თუ კორონავირუსმა თქვენი ყოველდღიური რეჟიმიც შეცვალა და, ჩვენი რედაქციის მსგავსად, თქვენც სახლიდან გიწევთ მუშაობა, შემოგვიერთდით Facebook ჯგუფში და გავუზიაროთ ერთმანეთს ეს საინტერესო გამოცდილება.

ერთად თავმოყრილი რეკომენდაციები:

ნახეთ წინა შეჯამებები: