დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

სოფლის მეურნეობის მინისტრის ინფორმაციით, ზოგიერთ პროდუქტზე პანიკური მოთხოვნა და უკონტროლო შესყიდვაა, რაც იწვევს რამდენიმე საათით ან დღით ამ პროდუქტის მიწოდების შეფერხებას და ფასების ზრდას.

ლევან დავითაშვილი მოუწოდებს მომხმარებელს, არ აყვნენ ცრუ პანიკას, რადგან ეს ისევ მათ აზარალებს.

"ჩვენი მოწოდების მიუხედავად, ხშირ შემთხვევაში, ვხედავთ პანიკურ მოთხოვნას და უკონტროლო შესყიდვებს. ბევრ სუპერმარკეტში თუ საცალო ობიექტში დღის განმავლობაში ზოგიერთ ასაწონ ბურღულეულზე იყო გარკვეული შეფერხება. ეს არის ერთადერთი მიზეზით გამოწვეული", - თქვა მინისტრმა.

მისივე ინფორმაციით, სახელმწიფოს მომწოდებლებთან უწყვეტი კომუნიკაცია აქვს, რათა პრობლემები არ შეიქმნას. ლევან დავითაშვილი ამბობს, რომ მათ შორის, 22 პროდუქტზე, რომელიც იდენტიფიცირებულია, როგორც პირველადი მოხმარების, სრული მონიტორინგი მიმდინარეობს.

ამასთან, სოფლის მეურნეობის მინისტრი აღნიშნავს, რომ რამდენიმე დღეში დიდი მარაგის შემოსვლას ელოდებიან და უამინდობამ გარკვეული შეფერხებები გამოიწვია. ლევან დავითაშვილის თქმით, სწორედ ამის გამო, ფოთში შემოსული გემებიდან პროდუქტის გადმოტვირთვა ამ დრომდე გრძელდება, ასევე, არის სირთულეები დასავლეთიდან აღმოსავლეთ საქართველოს დამაკავშირებელ მარშრუტებზე. გარდა ამისა, მინისტრი საუბრობს ლარსზე გაჩერებულ 1000-ზე მეტ სურსათით დატვირთული მანქანაზე, რომლებიც გადაადგილებას ვერ ახერხებენ, რადგან ზოგიერთ მონაკვეთზე გაწმენდითი სამუშაოები ზვავსაშიშროების გამო შეზღუდულია.

ლევან დავითაშვილმა კიდევ ერთხელ მოუწოდა ბიზნესს, რომ იყვნენ პასუხისმგებლიანები და ეს სიტუაცია სპეკულაციისთვის არ გამოიყენონ.

"ამას პანიკაც უწყობს ხელს და პროცესების მართვას კიდევ უფრო რთულს ხდის", - აღნიშნა მინისტრმა.

ეპიდსიტუაცია საქართველოში: შეზღუდვები და რეკომენდაციები

18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია. ამასთან, დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურებოსი ქვეშ — 216.

დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლიდებადია, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ. ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომდენტი დადგეს. ინფიცირების რისკის ზრდის შემთხვევაში, მთავრობა შეზღუდვების გამკაცრებას გეგმავს და კარანტინის გამოცხადებას არ გამორიცხავს.

რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს. აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე კი მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ამ ეტაპზე იძულებით კარანტინშია გადაყვანილი 99 ადამიანი. პარლაენტი განიხილავს, რომ თვითიზოლაციის წესების დარღვევა დასჯადი გახდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: