COVID-19-ის შესაძლო გავრცელების პრევენციის გამო იუსტიციის სახლის ყველა ფილიალში, საზოგადოებრივ ცენტრებსა და სახელმწიფო სერვისების განვითარების სააგენტოს ტერიტორიულ სამსახურებში მოქალაქეთა დაშვება მკაცრად შეიზღუდა. სივრცეებში არ დაიშვებიან, როგორც მომსახურების მისაღებად მისული მოქალაქეების თანმხლები პირები, ასევე ის მომხმარებლები, რომლებიც ბავშვებთან ერთად გამოცხადდებიან.

თბილისის იუსტიციის სახლში დარბაზში დასაშვები მომხმარებლის რაოდენობის კონტროლისთვის სპეციალური ჯებირები დამონტაჟდება. სპეციალური ჯებირები დამონტაჟდა ასევე თბილისის იუსტიციის სახლის ჯასთ-დრაივის სარკმელებთან, სადაც მზა დოკუმენტებს გასცემენ. აღნიშნული გადაწყვეტილება მომსახურების სივრცეში ხალხმრავლობის შეზღუდვას უკავშირდება.

იუსტიციის სახლი აცხადებს, რომ კორონავირუსის გავრცელების თავიდან აცილებისთვის მიღებულია ყველა შესაბამისი ზომა. ამასთან, მომხმარებელსა და ოპერატორს შორის დისტანციის გაზრდისთვის, ყველა მაგიდასთან კლავიატურა დაგრძელებული სადგამით აღიჭურვა.

იუსტიციის მინისტრმა, თეა წულუკიანმა 16 მარტს საზოგადოებას მოუწოდა, რომ გაითვალისწინონ კორონავირუსის პრევენციისთვის საჭირო რეკომენდაციები და სერვისცენტრებში მისვლისას ერთმეტრიანი დისტანცია დაიცვან. მანვე მოუწოდა ყველას, რომ შეურაცხყოფა არ მიაყენონ იუსტიციის სახლის თანამშრომლებს, რომლებიც საზოგადოებას ამ რეკომენდაციას აძლევენ.