ქართველები შეერთებულ შტატებშიც პოლიტიკურად აქტიურები არიან. სამშობლოში და ამერიკაში მიმდინარე პოლიტიკურ პროცესებზე ერთნაირად მგრძნობიარედ რეაგირებენ და აზარტში შედიან. ზოგიერთი ქართველი იმიგრანტი ამერიკაში დაბადებულ და გაზრდილ, ძირძველ ამერიკელზე უფრო აქტიურიც არის. დავით გოგოლაშვილი ნიუ-იორკში თექვსმეტი წელია ცხოვრობს. ის დონალდ ტრამპის მხარდამჭერია და რესპუბლიკელებს წინასაარჩევნოდ საარჩევნო ბუკლეტების დარიგებაშიც ეხმარებოდა. საარჩევნო შტაბში ის მელანია ტრამპს და სამხედრო დაზვერვის სამსახურის ყოფილ უფროსს, ტრამპის მრჩეველს, გენერალ მაიკლ ფლინსაც შეხვდა.

დავით გოგოლაშვილი: მე იქ დიდი საქმე არ მაქვს, ბუკლეტებს ვარიგებდით. მაგრამ მისი მთელი გარემოცვა ვნახე. მაგალითად, გენერალი ფლინი და ყველა მრჩეველი, მეუღლე, დამხმარე ხალხი. ხელი არ ჩამომორთმევია, მაგრამ დავინახე. იქ დრო არ გაქვს რომ მიხვიდე ხელი ჩამოართვა. ჩვენ ყველა საკუთარი საქმით ვართ დაკავებული. დავალაგეთ ბუკლეტები, ავუტანეთ და დიდი მადლობა გვითხრა.

თავად ემიგრანტს ტრამპის განცხადებები არალეგალ იმიგრანტებთან დაკავშირებით, უხერხულობას არ უქმნის.

დავით გოგოლაშვილი: ვუჭერ მხარს აბა რა. ეს ქვეყანა ქვეყანაა? რას დაემსგავსა? რომ იტყვიან ღია კარის დღეა, ვისაც უნდა შემოდის, ვისაც უნდა გადის. მე რომ ჩამოვედი 1993 წელს იყო. მე მივაღწიე ყველაფერს რაც მინდოდა. ხალხი ვინც შემოდის ქვეყანაში ოფიციალურად კი, გასაგებია, მაგრამ არალეგალები? ამდენი მკვლელობა და გაუპატიურება ხდება, კრიმინალი გაზრდილია. ამიტომ უნდა მას კონტროლის გამკაცრება და სწორია კედლის აშენება, კი ბატონო ჩაკეტოს საზღვარი.

თამარ ჯანგულაშვილი ამ საპრეზიდენტო არჩევნებში მონაწილეობას პირველად მიიღებს. საარჩევნო რეგისტრაციის გავლის შემდეგ სახლში ფოსტით მიუვიდა მოსაწვევი. ის დემოკრატების მხარდამჭერია.

თამარ ჯანგულაშვილი: დემოკრატების მხარდამჭერი ვარ და ხმას მივცემ დემოკრატების კანდიდატს.

2016 წლის საპრეზიდენტო არჩევნები განსაკუთრებული კომპრომატების ომით გამოირჩევა. ორივე კანდიდატის გარშემო სკანდალებმა გავლენა მათ საარჩევნო კამპანიაზე და რეიტინგზე რეალურად მოახდინა.

ნათია გაგუა: ძალიან მაინტერესებს იმეილების ამბავი. მაინც ვერ გავიგე რა ხდება. მგონია, დაუმთავარებელი საგაა. არ ვიცით, ვისაც არ უნდა ჰკითხო ზუსტი ინფორმაცია არავინ იცის, იყო თუ არა მართლა ჰილარი კლინტონი კორუფციულ გარიგებაში. ეს არავინ არ ვიცით. ასევე, ტრამპის შემთხვევაში იყო ქალებთან დაკავშირებით. გამოვიდნენ და თქვეს რომ იქ ბარში იყვნენ, ტრამპმა მუხლზე ხელი დაადო. ეს ჩემთვის დამაჯერებელი არ იყო. ჩემთვის გადამწყვეტი ტრამპის თაობაზე აღმოჩნდა აუდიოჩანაწერები, რომელშიც ტრამპი ქალებთან დაკავშირებით საუბრობს. აი ამან მოახდინა მთლიანი შთაბეჭდილება ჩემზე და ამით დაესვა წერტილი.

ნათია გაგუას ჯერ მწვანე ბარათი აქვს და მომავალ საპრეზიდენტო არჩევნებში უკვე შეეძლება საკუთარი არჩევანის გაკეთება. თუმცა, მისი სიმპატიები ჰილარი კლინტონისკენ იხრება.

ნათია გაგუა: არა იმიტომ, რომ ის ქალია, არანაირი გენდერული თვალსაზრისით არა. უბრალოდ, ვფიქრობ რომ ჭკვიანია ქალია და დიდი გამოცდილება აქვს.

ვინ იქნება შეერთებული შტატების რიგით 45-ე პრეზიდენტი ეს ნიუ-იორკში მცხოვრები ქართველებისთვის საინტერესოა საგარეო ურთიერთობების გამოც. ტრამპის მიერ პუტინის მიმართ და პირიქით გამოთქმული სიმპათიების მიუხედავად, მაინც ფიქრობენ, რომ ეს მხოლოდ წინასაარჩევნო რევერანსები იყო. ნათელა გოგიბედაშვილი ამბობს, რომ თანამედროვე მსოფლიოში საპრეზიდენტო კანდიდატთა კრიზისია, მაგრამ ამერიკის მომავალი პრეზიდენტი, მნიშვნელობა არ აქვს ვინ იქნება, საქართველოსთან მაინც მჭიდრო და მეგობრულ ურთიერთობებს შეინარჩუნებს.

ნათელა გოგიბედაშვილი: არაფერი არ შეიცვლება ჩვენთვის, ჩვენ უნდა შევცვალოთ ჩვენი ქვეყანა. თუ ჩვენ ერთად ვიქნებით და ერთმანეთი გვეყვარება, ყველა გაგვიწევს ანგარიშს.

ამერიკის სხვადასხვა შტატებში ხმის მიცემის პროცედურა უკვე დაწყებულია. ზოგან ერთი თვით ადრე, ზოგან კი რამდენიმე დღით ადრე უკვე შეიძლებოდა არჩევანის გაკეთება. თუმცა მთავარი დღე მაინც 8 ნოემბერია.

იმის მიუხედავად, ვინ გახდება ამერიკის პრეზიდენტი, ეს არჩევნები ამერიკის ისტორიისთვის უნიკალურია, ვინაიდან პირველად ამერიკის ისტორიაში პრეზიდენტის სავარძლის რეალური კანდიდატი ქალია.