ევროპული საქართველოს წევრი, ზურაბ ჭიაბერაშვილი ამბობს, რომ კორონავირუსის გავრცელების რისკის ზრდის ფონზე, ჯანდაცვის სამინისტროსგან სწორი და გააზრებული ქმედებებია საჭიროა, რასაც, რიგ შემთხვევებში "ვერ ვხედავთ". ამის შესახებ ჭიაბერაშვილმა დღეს გამართულ ბრიფინგზე ისაუბრა.

როგორც ჭიაბერაშვილმა განაცხადა, საჭიროა მეტი ინფორმაცია იმის შესახებ არის თუ არა საკმარისი რეანიმაციული საწოლები, სასუნთქი აპარატები და რას აკეთებს ჯანდაცვის სამინისტრო ამ მიმართულებით.

მისივე თქმით, ასეთ დროს ძალიან დიდი მნიშვნელობა აქვს ჰოსპიტალური სექტორის მზაობას, რაც კორონავირუსით ინფიცირებული ადამიანების გართულებული შემთხვევების მართვას ეხება.

"რაც უფრო მოიმატებს შემთხვევების რაოდენობა, სამწუხაროდ, უფრო მეტად დაგვჭირდება დიაგნოსტიკური სიმძლავრეების გაზრდაც და ძალიან მნიშვნელოვანია, რომ ჯანდაცვის სამინისტრომ არ შექმნას ბიუროკრატიული ბარიერები იმ ლაბორატორიებისათვის და ცენტრებისთვის, რომლებსაც დღეს აქვთ ინფრასტრუქტურაც და პერსონალიც, რათა ლუგარის ლაბორატორიის ცენტრის გარეთაც ჩატარდეს მსგავსი დიაგნოსტიკური კვლევები, თუ კი იქნება საკმარისი რეაქტივები", — განაცხადა ჭიაბერაშვილმა.

მისივე თქმით, სპეციალური ზრუნვის საგანი უნდა იყოს შეზღუდული შესაძლებლობის მქონე პირები და პანსიონატებში მყოფი მოხუცები.

ამ ეტაპზე საქართველოში კორონავირუსით ინფიცირების 13 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს. ამასთანავე. 7 მარტს კორონავირუსით ინფიცირების კიდევ 4 შემთხვევა დადასტურდა.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: