პრემიერ-მინისტრ გიორგი გახარიას ოფიციალური ფეისბუქგვერდი აქვს. როგორც მთავრობის პრესსამსახურში On.ge-ს განუცხადეს, არავერიფიცირებული გვერდი გახარია, რომელზეც აქამდე არ ადასტურებდნენ, რომ პრემიერს ეკუთვნის, დღეიდან შეიძლება ოფიციალურ წყაროდ გამოვიყენოთ.

პირველი პოსტი გახარიას ფეისბუქგვერდზე 24 იანვარს გამოქვეყნდა და ამ დროისთვის მას 52 000 გამომწერი ჰყავს. ეჭვები იმაზე, რომ ეს გვერდი პრემიერს ეკუთვნოდა დიდი ხნის წინ გაჩნდა, თუმცა აქამდე არ დასტურდებოდა. მაგალითად, 6 თებერვალს ამ გვერდზე გაზიარდა ერთ-ერთი სააგენტოს ბმული სათაურით: "სოციალურ ქსელში გიორგი გახარიას ნამდვილი გვერდი გამოჩნდა". პოსტს ახლდა წარწერა: "თქვენ როგორ ფიქრობთ?"

მიუხედავად იმისა, რომ გვერდი ოფიციალური არ იყო, ვრცელდებოდა სხვადასხვა შეხვედრაზე გადაღებული ფოტოები იქამდე, სანამ ისინი მთავრობის ოფიციალურ გვერდებზე გამოჩნდებოდა. მაგალითად, 4 მარტს გამოქვეყნდა სომხეთის პრემიერთან ერთად გადაღებული ფოტოები წარწერით: "ბომბორა და ჩვენ".

როგორც ჩანს, არაოფიციალური გვერდით პრემიერი მედიაში გავრცელებულ ინფორმაციებსაც პასუხობდა. 26 იანვარს გამოქვეყნდა პოსტი, რომელიც ირონიულად ეხმაურებოდა მთავრობაში არსებულ დაპირისპირებაზე გავრცელებულ ინფორმაციას.

პირველი პოსტი, რომელიც ამ გვერდზე ოფიციალურად პრემიერის სახელით გავრცელდა ქალთა მიმართ ძალადობას ეხება.