უკვე რამდენიმე კვირაა, ერაყის არმია ქვეყნის სიდიდით მეორე ქალაქის, მოსულის ტერორისტული ორგანიზაცია ისლამური სახელმწიფოსგან გასათავისუფლებლად მასშტაბურ ოპერაციას ატარებს. მათ წარმატებამდე სულ მცირე ნაბიჯი აქვთ დარჩენილი. ISIS-ის მოსულიდან განდევნის შემთხვევაში, ერაყის ტერიტორიაზე ტერორისტული დაჯგუფება, ფაქტობრივად არ იქნება. როგორც სპეციალისტები ვარაუდობენ, ერაყსა და სირიაში ISIS-ის პოზიციების შესუსტება იქ საომრად წასული ჯიჰადისტების ნაწილის სამშობლოში დაბრუნებას გამოიწვევს.

რას აპირებს სუს

On.ge-მ მიმართა სახელმწიფო უსაფრთხოების სამსახურს კითხვით, რას მოიმოქმედებს სახელმწიფო, თუ ერაყსა და სირიაში ISIS-ის მხარდასაჭერად წასული საქართველოს მოქალაქეები უკან დაბრუნებას მოინდომებენ. უწყებაში განგვიცხადეს, რომ დაბრუნების შემთხვევაში, ISIS-ის მებრძოლებს საზღვრის გადმოკვეთისას, სისხლის სამართლის კოდექსის 327-ე და 328-ე მუხლებით დააკავებენ.

საქართველოს სისხლის სამართლის კოდექსის 327-ე მუხლი გულისხმობს ტერორისტული ორგანიზაციის შექმნას, ან ხელმძღვანელობას, ანდა მასში მონაწილეობას. ხოლო, 328-ე მუხლი ასევე გულისხმობს უცხო ქვეყნის ტერორისტულ ორგანიზაციაში ან უცხოეთის კონტროლს დაქვემდებარებულ ასეთ ორგანიზაციაში გაერთიანებას, ანდა მის დახმარებას ტერორისტულ საქმიანობაში. დანაშაული ისჯება თავისუფლების აღკვეთით ვადით ათიდან თხუთმეტ წლამდე.

ქართველები სირიაში

სუს-ის ინფორმაციით, ამ დროისთვის დაახლოებით 40-მდე ქართველი იმყოფება ტერორისტული ორგანიზაცია ისლამურ სახელმწიფოში.

კახეთის საინფორმაციო ცენტის ცნობით კი, 2016 წლის აგვისტოს მონაცემებით, ტერორისტული ორგანიზაციის რიგებში ბრძოლისას, მხოლოდ პანკისის რეგიონიდან წასული საქართველოს 21 მოქალაქე დაიღუპა.

რისკები

ISIS-ის მიერ მოსულის დაკავებიდან 2 წლის შემდეგ, ერაყის არმიის დანაყოფები ქალაქში პირველად შეიჭრა. შედეგად, ISIS-ის უამრავი წევრი მოკლეს, თუმცა თავად ერაყის სამხედრო ძალას დანაკარგი არ ჰქონია.

ევროკავშირის კომისარმა ჯულიან კინგმა გერმანულ გამოცემა Die Welt-თან ინტერვიუში განაცხადა, რომ მოსულის ოპერაციამ ევროპაზე თავდასხმების რისკები გაზარდა.

როგორც WashingtonPost წერს, ერაყის ჩრდილოეთით, მოსულში ISIS-ის წინააღმდეგ დაწყებული წარმატებული სპეცოპერაციის შემდეგ, ევროპელი მაღალჩინოსნები ვარაუდობენ, რომ ჯიჰადისტები ევროპაში, თავიანთ სახლებში დაბრუნდებიან, რამაც შესაძლოა ტერორისტული აქტები განაახლოს. ორი წლის განმავლობაში ისლამური სახელმწიფო მოსულში გეგმავდა ძირითად ოპერაციებს და წვრთნიდა მებრძოლებს. ბრიუსელისა და პარიზის ტერაქტები იმ ადგილობრივმა თავდამსხმელებმა განახორციელეს, რომლების ერაყში და სირიაში გაწვრთნეს და შემდეგ თავიანთ ქვეყანებში დაბრუნდნენ.

ანტიტერორისტული ოპერაციის ცენტრის წარმომადგენლების თქმით, ჯერჯერობით ადრეა იმის დაზუსტებით თქმა, გამოუშვებს თუ არა მოსულის ოპერაცია ტერორისტების ახალ ტალღას ევროპაში, თუმცა გასულ წელს, როცა ისლამური სახელმწიფო ბრძოლის ველზე შესუსტდა, მათი ბევრი წევრი დაბრუნდა ევროპის ქვეყნებში.

გამოცემის ცნობით, დაახლოებით 4 000-დან 5 000-მდე ევროპელი წავიდა სირიასა და ერაყში, ISIS-ში საბრძოლველად.