ISIS-ის მიერ მოსულის დაკავებიდან 2 წლის შემდეგ, ერაყის სპეცნაზი ქალაქში შეიჭრა. შედეგად, ISIS-ის უამრავი წევრი მოკლეს, თუმცა თავად ერაყის სამხედრო ძალას დანაკარგი არ ჰქონია. ინფორმაციას BBC ავრცელებს.

აღნიშნული ISIS-ის წინააღმდეგ დაწყებული სპეცოპერაციის მე-17 დღეს მოხდა. ოპერაციაში 50 ათასი სამხედროა ჩართული, მათ შორის ქურთი სამხედროები და სუნიტი მეომრები.

სამხედრო ძალები, ქალაქში პირველად სამშაბათს შეიჭრნენ. სამხედროებმა კონტროლის ქვეშ სახელმწიფო ტელევიზიის შენობა აიღეს. კონტრტერორისტული სამსახურის წარმომადგენელმა განაცხადა, რომ შეიარაღებულმა ძალებმა ფრონტის ხაზი გაარღვიეს და ქალაქის მნიშვნელოვანი ნაწილის გათავისუფლება შეძლეს. აღნიშნული ტერიტორია მოსულში აღმოსავლეთის მხრიდან შესასვლელი მთავარი შესასვლელია.

მან განმარტა, რომ ძალიან მძიმე ბრძოლა ჰქონდათ ისლამური სახელმწიფოს წევრებთან და ამ ტერიტორიის გათავისუფლება სწრაფად შეძლეს. მისი თქმით, ISIS-მა უამრავი მებრძოლი დაკარგა.