შინაგან საქმეთა სამინისტრო განმარტავს, რომ საზღვრის კვეთისას სამედიცინო შემოწმება მხოლოდ იმ მოქალაქეებს უტარდებათ, რომლებიც ბოლო 2 კვირის განმავლობაში მაღალი რისკის ჯგუფის მქონე ქვეყნებში იმყოფებოდნენ. ასეთ ქვეყნებად კი ჯანდაცვის მსოფლიო ორგანიზაცია ჩინეთს, სამხრეთ კორეას, ირანსა და იტალიას ასახელებს. მათი თქმით, თუ მგზავრი ამ ქვეყნებში არ იმყოფებოდა, მათი სავალდებულო შემოწმება არ ხდება.

მათი თქმით, მგზავრთა ინტენსიური შემოწმება მიმდინარეობს სასაზღვრო სახმელეთო გამტარ პუნქტებში: წითელი ხიდი, სადახლო, სარფი და დარიალი, ასევე, საჰაერო სასაზღვრო გამტარ პუნქტებში — საქართველოს სამივე აეროპორტში: თბილისში, ქუთაისსა და ბათუმში. მათივე თქმით, აღნიშნულ გამტარ პუნქტებში მუდმივად მორიგეობს სამედიცინო პერსონალი.

შსს-ს განმარტებით, მესაზღვრე მგზავრის პირველადი შეფასების შემდეგ მისი მოგზაურობის ისტორიას ამოწმებს და საჭიროების შემთხვევაში ამისამართებს მორიგე ექიმთან. რისკის დაფიქსირების შემთხვევაში კი ხდება სამედიცინო ბრიგადის გამოძახება, რომელიც ამოწმებს მგზავრს და შედეგის მიხედვით ატარებს შესაბამის პროცედურებს.

უწყების განცხადებით, სასაზღვრო გამტარ პუნქტებში, ყოველდღიურად, 24 საათის განმავლობაში, 25-დან 30 ათასამდე მოქალაქე შემოდის.

26 თებერვალს საქართველოში ახალი კორონავირუსით ინფიცირების პირველი შემთხვევა დაფიქსირდა. ვირუსი დაუდგინდა საქართველოს მოქალაქეს, რომელიც აზერბაიჯანის გავლით ირანიდან საქართველოში შემოვიდა. მინისტრის თქმით, ის საბაჟოდან პირდაპირ ინფექციურ საავადმყოფოში გადაიყვანეს და სხვა ადამიანებთან შეხება არ ჰქონია. მისივე თქმით, მებაჟეები, რომლებმაც ის შეამოწმეს, პრევენციისთვის, კარანტინში მოთავსდებიან.

გაიგეთ მეტი კორონავირუსის პრევენციის შესახებ: