საქართველოს პრეზიდენტმა გამოთქვა ინიციატივა, რომ ქალაქის ცენტრში საერთო მემორიალი გაიხსნას, რომელიც "ყველა ჩვენს ომსა და ბრძოლაში" დაღუპულთა ხსოვნას მიეძღვნება. საუბრისას მან ორი მაგალითი, ცხრა აპრილისა და იუნკერთა ხსოვნისადმი მიძღვნილი მემორიალი დაასახელა.

"დრო მოვიდა, რომ ჩვენ ერთი ადგილი გამოვყოთ ამ ქალაქში, სადაც იქნება მემორიალი ყველასთვის. არა ის პატარა დაფა, რომელიც გარეთ არის [9 აპრილის მემორიალი]; არა ეს ადგილი [იუნკერთა მემორიალი], სადაც საზოგადოება ისე ადვილად ვერ შემოდის, როგორც საჭიროა", — განაცხდა მან იუნკერთა ხსოვნისადმი მიძღვნილ ღონისძიებაზე.

პრეზიდენტის თქმით, მემორიალს შემეცნებითი შინაარსიც უნდა ჰქონდეს, იმისთვის რომ ახალგაზრდებმა უკეთ გაიგონ, თუ რა გზა გაიარა ქვეყანამ.

პრეზიდენტი, პრემიერი, პარლამენტის თავმჯდომარე და თავდაცვის მინისტრი იუნკერთა ხსოვნისადმი მიძღვნილ ღონისძიებას დაესწრნენ, რომელიც პარლამენტის ეზოში გაიმართა. პარლამენტში არსებულ სამლოცველოში გაიმართა იუნკერთა მოსახსენიებელი პარაკლისიც.

99 წლის წინ, 1921 წლის 23 თებერვალს იუნკერები კოჯორ-ტაბახმელას მისადგმობეთან საქართველოს დამოუკიდებლობისთვის ბრძოლაში საბჭოთა არმიას ემსხვერპლნენ. ყოველ წელს მათი ხსოვნის პატივსაცემად სპეციალური ღონისძიებები იმართება.