თბილისის მერიის განცხადებით, სითი პარკმა დავა შეწყვიტა. როგორც მერიაში აცხადებენ, მერიამ კომპანიას 4 300 000 აშშ დოლარი გადაუხადა, სანაცვლოდ კი სითი პარკის კუთვნილი მატერიალური აქტივები მიიღო.

თბილისის მერიამ სითი პარკს ექსკლუზიური ხელშეკრულება 2007 წელს გაუფორმა და მას ვადა 2025 წელს გასდიოდა. მერიამ კომპანიასთან ხელშეკრულება 2018 წელს გაწყვიტა და პირგასამტეხლოს სახით 25 მილიონი ლარის გადახდა ეკისრებოდა. მერიაში განმარტავდნენ, რომ კომპანია ნაკისრ ვალდებულებებს ვერ ასრულებდა და ისინი ჯარიმას არ გადაიხდიდნენ.

როგორც მერიაში აცხადებენ, ხელშკერულების გაწყვეტის შემდეგ სითი პარკმა სამართლებრივი დავა სასამართლოსა და საერთაშორისო არბიტრაჟში წამოიწყო.

"კომპანიასა და თბილისის მუნიციპალიტეტს შორის მიღწეული იქნა ოპტიმალური შეთანხმება, რომლის მიხედვით, თბილისის სატრანსპორტო კომპანიამ აიღო ვალდებულება პარკირების სისტემის მართვიდან მიღებული შემოსავლებიდან სითი პარკს 4 300 000 აშშ დოლარი გადაუხადოს", — აღნიშნულია მერიის განცხადებაში.

კონტრაქტის გაუქმების დღიდან, პარკირების ფუნქციებს თბილისის სატრანსპორტო კომპანია ასრულებს.