ევროპარლამენტში ევროპელი სოციალისტების პარტია (PES) გიგი უგულავას საქმეზე ფაქტების დამდგენი მისიის მივლინების მომხრეა.

"ჩვენ მივესალმებით ამ ნაბიჯს, რომელიც საქართველოს მართლმსაჯულების გამჭვირვალობისკენაა მიმართული. მისია, რომელსაც სოციალ-დემოკრატიული ალიანსისა და ევროპის სახალხო პარტიის წევრები უხელმძღვანელებენ, დაგვეხმარება საქმის არსის შესწავლასა და შეფასებაში და უფრო მეტ სიცხადეს შემოიტანს", — განაცხადა PES-ის პრეზიდენტმა, სერგეი სტანიშევმა.

ქართული ოცნების დეპუტატმა, ირაკლი კობახიძემ თქვა, რომ ევროპარლამენტარები საქართველოში უნდა ჩამოვიდნენ და შეისწავლონ თბილისის ყოფილი მერის საქმე. ქართულმა ოცნებამ ევროპალრმანეტრაბე შესთავაზა, რომ ფაქტების დამდგენი კომისია შეიქმნას, რომელიც უგულავას საქმეს დეტალურად შეისწავლის.

გიგი უგულავას დაკავებასთან დაკავშირებით შეშფოთება გამოთქვეს როგორც ევროპარლამენტარებმა, ასევე ამერიკელმა კონგრესმენებმა. გარდა ამისა, პოლიტიკოსის დაკავებაზე შეშფოთება გამოთქვეს შვედეთის, ესტონეთის და ლიეტუვის საგარეო საქმეთა მინისტრებმა.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".