ლიეტუვის ყოფილი პრემიერ-მინისტრი და ევროპარლამენტის წევრი ანდრიუს კუბილიუსი აცხადებს, რომ საქართველოში მიმდინარე მოვლენებით მძიმედაა შეშფოთებული. კუბილიუსი მთავარ პრობლემად შეუსრულებელ დაპირებებს ასახელებს, რომლებიც პარლამენტისა და ქართული ოცნების თავმჯდომარეებისგან მიიღო. კერძოდ, საარჩევნო სისტემაზე დიალოგსა და ოპოზიციონერი დეპუტატების დევნას.

რუსთავი 2-თან საუბარში ის ხაზს უსვამს, რომ შეშფოთებას არა რომელიმე პარტიის მხარდამჭერი, არამედ საქართველოს მეგობარი ევროპარლამენტარები იზიარებენ. მისი თქმით, კარგი იქნება, თუ საქართველოს მთავრობა ამ შეშფოთებას გაითვალისწინებს.

"რა ინფორმაციაც გვაქვს, იმას თუ დავეყრდნობით, აღარ არსებობს ოპოზიციური პოლიტიკური პარტია, რომელიც მთავრობის მიერ არაა სამართლებრივად დევნილი. ეს კი იმას ნიშნავს, რომ დემოკრატიული განვითარება ქვეყანაში საფრთხის ქვეშაა და ეს ევროპარლამენტარების იმ ნაწილსაც გვაშფოთებს, რომლებიც თავს საქართველოს მეგობრებად მივიჩნევთ და არა რომელიმე პარტიის. ჩვენთვის ასეთი რამის ყურება ძალიან მტკივნეულია", — განაცხადა მან.

უზენაესმა სასამართლომ 10 თებერვალს გიგი უგულავას პატიმრობა შეუფარდა, რის გამოც ოპოზიციამ მთავრობასთან მოლაპარაკებები შეწყვიტა და აქციები დააანონსა. მათი თქმით, ეს არის პოლიტიკური დევნა, რადგან საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ, შალვა თადუმაძემ განიხილა.