იაპონიაში გაჩერებული საკრუიზო ლაინერის კიდევ 41 მგზავრს კორონავირუსი აღმოაჩნდა. საკრუიზო ლაინერი Diamond Princess, რომლის ბორტზე 3 700 ადამიანია, ორ კვირაზე მეტია კარანტინშია და იოკოჰამაშია გაჩერებული. ჯამში კორონავირუსით 61 მგზავრია დაინფიცირებული.

ლაინერის მგზავრების შემოწმება მას შემდეგ დაიწყეს, რაც 80 წლის ჰონგ-კონგელ კაცს კორონავირუსი დაუდასტურდა. ის გემზე 20 იანვარს იოკოჰამაში ავიდა და 25 ჰონგ-კონგში ჩამოვიდა.

დაინფიცირებულებს შორის ყველაზე მეტი იაპონიის მოქალაქეა (28). გარდა ამისა, კორონავირუსი აქვთ აშშ-ს (11), ავსტრალიის (7), კანადის (7), ჩინეთის (3), დიდი ბრიტანეთის (1), ახალი ზელანდიის (1), ტაივანის (1), ფილიპინებისა (1) და არგენტინის (1) მოქალაქეებს.

Diamond Princess-ზე კარანტინი 19 თებერვლამდე გაგრძელდება, თუმცა მედიკამენტების მიწოდების პრობლემა უკვე გაჩნდა. ერთ-ერთმა იაპონელმა მგზავრმა გემბანიდან იაპონიის დროშა გადმოფინა წარწერით "მედიკამენტების დეფიციტი". იაპონურმა ტელეკომპანიამ კი ნაპირიდან ბანერით იკითხა "რომელი მედიკამენტი?".

გარდა ამისა, კიდევ ერთი საკრუიზო ლაინერი World Dream ჰონგ-კონგში კარანტინში მოექცა მას შემდეგ, რაც რვა ყოფილ მგზავრს ახალი ვირუსი აღმოაჩნდა. ლაინერზე 3 600 ადამიანია და ჯერჯერობით არც ერთ მათგანს ახალი ტიპის ვირუსზე დადებითი პასუხი არ ჰქონია.

ახალ კორონავირუსს მწვავე რესპირატორული ინფექციის გამოწვევა შეუძლია, რამაც შესაძლოა ლეტალური შედეგი მოიტანოს. ახალი ვირუსი ჩინეთის ქალაქ უხანში გაჩნდა და ჩინეთის გარდა, 25 ქვეყანაში დაფიქსირდა.

კორონავირუსის გამო უკვე 636 ადამიანია გარდაცვლილი, ხოლო დაინფიცირებულთა რიცხვმა 31 ათასს გადააჭარბა. ჩინეთს გარეთ მხოლოდ ორი ადამიანი გარდაიცვალა ფილიპინებსა და ჰონგ-კონგში.