რუსეთის პრეზიდენტის ადმინისტრაციაში სხეულის ტემპერატურას გაუზომავენ ყველას, ვინც ვლადიმერ პუტინთან შესახვედრად მიდის. ამის შესახებ ინფორმაცია პირველად ტვ რეინის ჟურნალისტმა, ანტონ ჟელნოვმა გაავრცელა. მისივე თქმით, ტემპერატურას სპეციალური ხელსაწყოთი ზომავენ.

პრეზიდენტის პრესსპიკერი დიმიტრი პესკოვი ამბობს, რომ კრემლში კორონავირუსის თავიდან აცილებისთვის დამატებითი ზომებია გატარებული. ამავე დროს, ვიცე-პრემიერმა, ტატიანა გოლიკოვამ, რომელიც კორონავირუსთან ბრძოლის ოპერატიულ შტაბს ხელმძღვანელობს, განაცხადა, რომ კრემლში შემოწმება არა კორონავირუსის, არამედ სეზონური გრიპის გამო ტარდება.

2019 წლის დეკემბრის ბოლო ჩინეთის ქალაქ უხანში ახალი ტიპის კორონავირუსის ეპიდემია დაიწყო. ამ ეტაპისთვის კორონავირუსით 565 ადამიანი გარდაიცვალა, დაინფიცირებული კი 28 ათასია. ჩინეთს გარეთ ინფიცირების 250 შემთხვევა დაფიქსირდა და ორი ადამიანი გარდაიცვალა.

ამ ეტაპისთვის რუსეთში კორონავირუსის ორი შემთხვევაა დადასტურებული.