საპროკურორო საბჭომ ირაკლი შოთაძე გენერალური პროკურორობის შესარჩევ შემდეგ ეტაპზე გადაიყვანა. საბჭომ შოთაძესთან ერთად პირველ ეტაპზე კიდევ სამი კანდიდატი ფარული კენჭისყრით აირჩია. პირველ ეტაპზე შერჩეულთა შორის ირაკლი შოთაძეს ყველაზე მეტი, 10 ხმა ჰქონდა.

იმისათვის, რომ შოთაძე გენერალური პროკურორი გახდეს, მან კიდევ ერთი ეტაპი უნდა გაიაროს. ხვალ, 7თებერვალს, საპროკურორო საბჭომ პირველ ეტაპზე შერჩეული ოთხი კანდიდატიდან ერთი უნდა აირჩიოს, რომელსაც დასამტკიცებლად პარლამენტს გადაუგზავნის.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო. არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.