ქართული ოცნების დეპუტატმა, კარო კოპალიანმა, რომელიც ტექნიკური უნივერსიტეტში კანცლერად არჩევის შემდეგ პარლამენტს ტოვებს, გამოსამშვიდობებელ სიტყვაში ბიძინა ივანიშვილს მადლობა გადაუხადა.

"მადლობა ბატონ ბიძინას, იმ ადამიანს, რომელმაც ეს ყველაფერი შექმნა ჩემსა და ჩვენ ირგვლივ. მადლობა კაცს, რომელმაც შეძლო და საქართველოში პირველად არჩევნების გზით შეცვალა მოძალადე ხელისუფლება. ადამიანს, რომელმაც, ერთ-ერთმა პირველმა დამიძახა თავის დროზე და მომცა შანსი ვყოფილიყავი იმ ხალხის გვერდი, ვინც დააფუძნა ქართული ოცნება, გაგვეარა მრავალი წელი, განსაცდელი და გაგვემარჯვა. მადლობა მას ამ შესაძლებლობისთვის. მადლობა მას იმ შვიდი წლისათვის, რომ მომეცა საშუალება და მოკრძალებული სიტყვა მეთქვა ქართულ პოლიტიკაში. ქართული ოცნებისა და ჩვენი ქვეყნის უპირობო ლიდერს ბატონ ბიძინა ივანიშვილს, კახის, ირაკლის, დიტოს, ჩვენს პარტიულ ოფისს, ჩვენს ყველა თანამოაზრეს..."

გარდა ამისა კოპალიანმა სამადლობელ სიტყვაში მოიხსენია საკუთარ ამომრჩეველი, მედია, პრემიერ-მინისტრ გიორგი გახარია, მთავრობა და თავისი თანაგუნდელები.

"მე მინდა შევქმნა ამ დარბაზში პრეცედენტი როდესაც პარლამენტს ტოვებს გუნდის წევრი არა გაბრაზებული, არამედ მადლიერებით აღვსილი. მინდა, რომ ეს პრეცედენტი მაგალიათად იქცეს მომავალში. სამადლობელი იქნება ჩემი გამოსვლის ლაიტმოტივი", — განაცხადა კოპალიანმა გამოსვლის დაწყებისას.

დასრულების შემდეგ კი მან თანაგუნდელების ტაში დაიმსახურა.

ქართულმა ოცნებამ კარლო კოპალიანისთვის სადეპუტატო მანდატის შეწყვეტას მხარი დაუჭირა. ბოიკოტის გამო სხდომა არ ესწრებიან ოპოზიციური პარტიები ნაციონალური მოძრაობა, ევროპული საქართველო და პატრიოტთა ალიანსი.