ორგანიზაცია სამართლიანი არჩევნები 30 ოქტომბერს, საქართველოს პარლამენტის არჩევნების მეორე ტურის მიმდინარეობის შესახებ განცხადებას ავრცელებს.

ამ დროისთვის სამართლიანი არჩევნების დამკვირვებლების მიერ საუბნო საარჩევნო კომისიების ჩანაწერთა წიგნებში დაფიქსირდა 49 შენიშვნა, საუბნო საარჩევნო კომისიაში წარდგენილია 31 საჩივარი, ხოლო საოლქო საარჩევნო კომისიაში - 32 საჩივარი.

ISFED-ის ძირითადი დასკვნები

15:00 საათის შემდეგ, სამართლიანი არჩევნების დამკვირვებლების ინფორმაციით კენჭისყრის პროცესი მშვიდ გარემოში მიმდინარეობს, უმეტეს შემთხვევაში საარჩევნო კომისიის წევრები იცავენ კანონის დადგენილ პროცედურებს.

სამართლიანი არჩევნების ინფორმაციით, დარღვევების უმეტესი ნაწილი მარნეულის მაჟორიტარულ საარჩევნო ოლქში ფიქსირდება. დამკვირვებელმა დააფიქსირა ხმის მიცემის ფარულობის დარღვევის - 1, საარჩევნო უბანზე აგიტაციის 1, ხმის ხელმეორედ მიცემის - 1, კენჭისყრის ფარულობის დარღვევის 1, არაუფლებამოსილი პირების უბანზე ყოფნის - 2, მარკირების პროცედურის დარღვევის - 1, საარჩევნო დოკუმენტაციებისა და პროცედურების არასათანადო წარმოების - 4, გადასატანი საარჩევნო ყუთის პროცედურის დარღვევის - 5 და ჟურნალისტის საქმიანობის შეჟღუდვის 1 ფაქტი. ამომრჩეველთა აქტივობა 17:00 საათისთვის PVT შედეგების მიხედვით

სამართლიანი არჩევნების მონაცემებით, 17:00 საათზე ამომრჩეველთა აქტივობა წარმოადგენს 30,9%-ს. მიღებული ინფორმაციის თანახმად, საარჩევნო უბნების 89,6 პროცენტზე ხმის მიცემის სისწრაფე წარმოადგენდა ერთ ამომრჩეველს წუთში, ხოლო საარჩევნო უბნების 10,4%-ზე ხმის მიცემის სისწრაფე იყო 1-დან 2 ამომრჩევლამდე წუთში.