იუსტიციის მინისტრი და ვიცე-სპიკერი, თეა წულუკიანი ევროსაბჭოს მინისტერიალის ფარგლებში საქართველოში რუსეთის დელეგაციის არ შემოშვებაზე ამბობს, რომ ეს ქვეყნისთვის "სანქციებით დასრულდება".

მისივე თქმით, მინისტერიალამდე ჯერ დროა და როდესაც "კონკრეტული საკითხი" დადგება, მაშინ გადაწყვეტს ქვეყანა, როგორ მოიქცეს.

"რომელიმე წევრი ქვეყნის დელეგაციის საქართველოში არ შემოშვება, დამთავრდება საქართველოსთვის სანქციებით. ეს სანქციები უნდა ოპოზიციას, რომ ქართული ოცნების ხელისუფლების პირობებში დაედოს საქართველოს. ასევე არსებობს ჩვენი ქვეყნის შიდა კანონმდებლობა და ჯერ მანამდე დროა. როდესაც დადგება კონკრეტული საკითხი, ტარდება ეს სხდომა საქართველოში, თბილისში, ტარდება სტრასბურგში, ვინ ჩამოდის, ვინ მიდის, ამის შემდგეგ, რა თქმა უნდა, შეიძლება ამაზე მსჯელობა", — განაცხადა თეა წულუკიანმა.

საქართველოს პრეზიდენტ, სალომე ზურაბიშვილის თქმით, საქართველო ოკუპაციის შესახებ კანონის გვერდის ავლით აპირებს, რომ რუსეთის დელეგაციის ისეთ წევრებს უმასპინძლოს, რომელთაც შესაძლოა ეს კანონი დარღვეული ჰქონდეთ. ამის შესახებ ზურაბიშვილმა ევროსაბჭოს საპარლამენტო ასამბლეის რუსეთის დელეგაციის წევრის, ლეონიდ კალაშნიკოვს კითხვაზე პასუხად განუცხადა, რომელიც თბილისში დაგეგმილ ევროსაბჭოს მინისტერიალს ეხებოდა.

კალაშნიკოვმა ზურაბიშვილს გაზაფხულზე დაგეგმილ ევროსაბჭოს მინისტერიალთან დაკავშირებით კითხვის დასმისას უთხრა, რომ "საქართველო ხდება საშიში არა მხოლოდ პოლიტიკური, რელიგიური, ეროვნული უმცირესობების მიმართ, არამედ პარლამენტარებისთვისაც".