აშშ-ს პრეზიდენტმა დონალდ ტრამპმა და ისრაელის პრემიერ-მინისტრმა ბენიამინ ნეთანიაჰუმ ახლო აღმოსავლეთში კონფლიქტის მოგვარების ახალი გეგმა წარადგინეს. ახალ გეგმაზე მათ თეთრ სახლში ისაუბრეს.

როგორც ტრამპი ამბობს, 180-გვერდიანი გეგმის მიხედვით, ისრაელის დედაქალაქი "გაუყოფელი იერუსალიმი იქნება. ამავე დროს ტრამპი განმარტავს, რომ აშშ აღიარებს პალესტინას და მისი დედაქალაქი აღმოსავლეთ იერუსალიმის აღმოსავლეთ ნაწილში იქნება განთავსებული. დოკუმენტი ტრამპის სიძემ და მისმა მრჩეველმა ჯარედ კუშნერმა შეიმუშავა. მოლაპარაკებებში კი პალესტინური მხარე ჩართული არ იყო.

"ჩემი ხედვა ორივე მხარისთვის სარგებელს ითვალისწინებს. ორი სახელმწიფოს შექმნის საფუძველზე რეალისტური გადაწყვეტილება, რომელიც გამორიცხავს პალესტინის სახელმწიფოებრიობის რისკს ისრაელის უსაფრთხოებისთვის. დღეს ისრაელმა მშვიდობისკენ უდიდესი ნაბიჯი გადადგა", — განაცხადა დონალდ ტრამპმა.

აშშ-ს პრეზიდენტი ამატებს, რომ გეგმის შესრულების შემთხვევაში არც ისრაელელებს და არც პალესტინელებს საკუთარი სახლების დატოვება არ მოუწევთ. მისივე მტკიცებით, სამშვიდობო გეგმა ითვალისწინებს, რომ პალესტინური ტერიტორიები გაორმაგდება, ხოლო იორდანეს დასავლეთ სანაპირო ორ ნაწილად გაყოფილი არ იქნება.

დონალდ ტრამპმა ტვიტერზე გაასაჯაროვა რუკა, რომელის შეთანხმებასა და ტერიტორიების გადანაწილებას ასახავს.

ფოტო: დონალდ ტრამპი / Twitter

ისრაელის პრემიერმა კი თეთრ სახლში აშშ-ს პრეზიდენტს მადლობა გადაუხადა, რადგან მან დასავლეთ სანაპიროზე ისრაელის სუვერენიტეტი აღიარა.

28 იანვარს ათასობით პალესტინელი ტრამპის გეგმის წინააღმდეგ გამოვიდა ჯერ კიდევ მანამ, სანამ მას ოფიციალურად გაასაჯაროებდნენ. თეთრ სახლში პრესკონფერენციის შემდეგ კი პალესტინის პრეზიდენტმა მაჰმუდ აბასმა განაცხადა, რომ "იერუსალიმი არ იყიდება", ხოლო ტრამპისა და ნეთანიაჰუს გეგმას პალესტინელები "ისტორიის სანაგვეზე გადააგდებენ".

ამავე დროს აბასმა განმარტა, რომ ისინი მზად არიან მოლაპარაკებებისთვის, მაგრამ არა აშშ-სთან და არც ტრამპის გეგმის გარშემო, არამედ მთლიანად ახლო აღმოსავლეთთან. ჰამასმა უკვე განაცხადა, რომ ტრამპის გეგმას უარყოფს.

ამჟამად პალესტინა ორი ტერიტორიისგან შედგება, რომელთა შორის საერთო საზღვარი არაა: ღაზას სექტორი, რომელსაც ჰამასის დაჯგუფება აკონტროლებს, და იორდანეს დასავლეთ სანაპირო, რომელსაც მაჰმუდ აბასის ადმინისტრაცია აკონტროლებს და სადაც ისრაელის ჯარებია განთავსებული.

ტრამპის გეგმის ერთ-ერთი პუნქტი პალესტინაში ინვესტიციების მოზიდვას ითვალისწინებს. აშშ-ს პრეზიდენტი პალესტინას 50-მილიარდიან ინვესტიციას ჰპირდება, რაც მილიონ სამუშაო ადგილს შექმნის.