საქართველოს პრეზიდენტმა, სალომე ზურაბიშვილმა ევროპის საბჭოს საპარლამენტო ასამბლეაზე სიტყვით გამოსვლისას ქვეყანაში სიტყვისა და გამოხატვის თავისუფლებაზე ისაუბრა და აღნიშნა, რომ "თავისუფლებას საზღვარი არ აქვს".

ზურაბიშვილმა სიტყვის თავისუფლების რეგულირების საჭიროებაზე სასაუბროდ ევროპის საბჭოს ტრიბუნაც გამოიყენა და თქვა, რომ საზოგადოებას "სიძულვილის ენა ამძიმებს". პრეზიდენტის თქმით, შეუზღუდავი გამოხატვის თავისუფლება "ისედაც პოლარიზებულ საზოგადოებაში დაძაბულობის მატებას უწყობს ხელს".

"სიტყვისა და გამოხატვის თავისუფლება საქართველოს კონსტიტუციით გარანტირებული და სრულად დაცულია. მაგრამ რეალობა კანონმდებლობის ჩარჩოებს სცდება: თავისუფლებას არ აქვს საზღვარი, რაც ხშირად საზოგადოებას სიძულვილის ენით ამძიმებს. კონტროლის მექანიზმისა და თვითრეგულირების არქონა კი, როგორც სხვაგან, საქართველოშიც ართულებს სოციალურ გარემოს. როგორც თავისუფალ, განვითარებულ ქვეყნებში ხდება, სოციალურ მედიაში გამოხატვის თავისუფლება იქაც პასუხისმგებლობის შეგრძნების გარეშე ხორციელდება, იგი ხშირად ანონიმურია", — განაცხადა ზურაბიშვილმა.