ჯანდაცვის მინისტრმა, ეკატერინე ტიკარაძემ ცოტა ხნის წინ თქვა, რომ კორონავირუსთან დაკავშირებით, ჩინეთიდან საქართველოს მოქალაქეების ევაკუაცია იგეგმება. მინისტრმა, ასევე, აღნიშნა, რომ სახელმწიფო ფრენებსაც აკრძალავს.

"ფრენები აიკრძალება, ჩვენი მოქალაქეების ევაკუაცია იგეგმება და დღეს, დღის მეორე ნახევარში ჩვენ გვექნება შეხვედრა, სადაც მივიღებთ გადაწყვეტილებას, თუ რა გზით მოხდება ამ მოქალაქეების ევაკუაცია. მსოფლიო ერთობლივად ებრძვის კორონავირსუსს, ჩვენ ჩართული ვართ მსოფლიო ჯანდაცვის ორგანიზაციასთან ერთად კორონავირუსის პრევენციის ღონისძიებებში, შესაბამისად ვაკეთებთ ყველაფერს", — თქვა ეკატერინე ტიკარაძემ ჟურნალისტებთან საუბრისას.

ფრენების აკრძალვასთან დაკავშირებით დღეს ეკონომიკის მინისტრმა, ნათია თურნავამაც ისაუბრა და თქვა, რომ საქართველო უსაფრთხოების მიზნით, სავარაუდოდ, ამ გადაწყვეტილებას მიიღებს.

ჩინეთში საქართველოს ელჩის თქმით, ქალაქ ვუხანში, რომელიც ვირუსისი გავრცელების კერად ითვლება, საქართველოს სამი მოქალაქე იმყოფება.

ჩინეთში კორონავირუსით უკვე 106 ადამიანი გარდაიცვალა. დაავადებულთა რიცხვი კი 4,500-ს აჭარბებს. ჩინეთმა კორონავირუსთან ბრძოლის მიზნით 13 ქალაქში გადაადგილება 36 მილიონ ადამიანს შეუზღუდა.

კორონავირუსის შემთხვევა 10-ზე მეტ ქვეყანაში გამოვლინდა, მათ შორის:სამხრეთ კორეაში, იაპონიაში, ტაილანდში, მალაიზიაში, ნეპალში, ვიეტნამში, აშშ-ში, საფრანგეთშ, ავსტრალიაში, კანადასა და შრილანკაში.

ჯანდაცვის მსოფლიო ორგანიზაციის გენერალური დირექტორი, ადჰანომ გებრეიესუსი აცხადებს, რომ გლობალური განგაშის საფუძველი ჯერჯერობით არ არსებობს.

გაიგეთ მეტი: