90-იანების ბავშვებს გემახსოვრებათ "მამალო", გაურკვეველი წარმომავლობის კარამელიზებული ნივთიერება, რომელსაც ქუჩა-ქუჩა დაატარებდნენ ან სკოლების წინ ყიდდნენ. არავინ იცის, რა პირობებში ამზადებდნენ ამ ტკბილეულს, რა მასალას იყენებდნენ და საიდან მოდიოდა ჯოხები, რომლებზეც წამოცმული იყო მამლების, კურდღლებისა და ცხენების ფორმები.

შეიძლება ითქვას, რომ მამალოების წინაპრები იაპონელები არიან და ტკბილეულის ამ სახით დამზადება, როგორც სხვა ყველაფერი, ხელოვნების დონეზე აქვთ აყვანილი.

27 წლის შინირო ტეზუკა ერთ-ერთი იმ ახალგაზრდათაგანია, რომელიც ჯერჯერობით ინარჩუნებს ამეზაიკუს მომაკვდავ ტრადიციას. თვითნასწავლი არტისტის ხელოვნების ნიმუშების დონეზე შესრულებული საწუწნი კანფეტები შესაჭმელად დაგენანებათ.

როგორც შინირო ვიდეოში ამბობს, ტკბილი ქანდაკების შექმნა მანამდე უნდა მოასწროს, ვიდრე მასალა გაცივდება, შესაბამისად, ამ საოცარი ფორმების დასამზადებლად მას მხოლოდ 5 წუთი აქვს.

გარდა ბიზნესისა, შინიროსთვის მისი საქმიანობა ტრადიციის გადარჩენის გზაა.