გონიოს მაგისტრალზე მრავალწლიანი ევკალიპტების გაჩეხვა იმ მიზნით დაიწყეს, რომ ტრაილერების ავტოსადგომი გააკეთონ. ამ დროისთვის ერთი ხეა მოჭრილი, ხვალ კი ხეები გაჩეხვა ისევ გაგრძელდება.

ხეების მოჭრა თურქულმა კომპანიამ დღეს დაიწყო. ადგილზე მისულ ჟურნალისტებს კომპანიის წარმომადგენელმა განუცხადა, რომ ხეების გაჩეხვის ნებართვა აქვს, თუმცა, შესაბამისი დოკუმენტი არ წარუდგენია.

მრავალწლიანი ევკალიპტების გაჩეხვას საზოგადოების პროტესტიც მოჰყვა:

"ეს არის ძალიან მარტივი, ზედაპირული ვანდალიზმი ქალაქისა და მისი შემოგარენის მისამართით. ეს კიდევ ერთხელ ადასტურებს, რომ ყველაფერი ნებადართულია იმისთვის, რომ ე.წ. ინვესტიცია მაინცდამაინც მწვანე ზონაში უნდა განხორციელდეს და ქარსაცავ ზოლში".

ქრონიკის ინფორმაციით, ადგილზე გარემოს დაცვის საზედამხედველო სამსახურის წარმომადგენლებიც მივიდნენ, თუმცა ტერიტორია კომპანიის დაჯარიმებისა და კომენტარის გარეშე დატოვეს. ბათუმის მერია კი განმარტავს, რომ ქარსაცავი ზონა კერძო კომპანიის ტერიტორიაზეა და შესაბამისად, ხეების გაჩეხვას ვერ შეაჩერებს.

ბათუმის მერიის წარმომადგენლის, თემურ ქიძინაძის თქმით, ხეების გაჩეხვის თაობაზე ნებართვას გამწვანების სამსახური გასცემს:

"ამათ ჰქონდათ ადრე ნებართვა, მაგრამ ახლა არ ვიცი რამდენი ხე მოჭრეს, ეს თვითონ მათ უნდა შეამოწმონ".