თბილისში 2021 წლის ევრობასკეტისთვის ახალი დარბაზი მაინც აშენდება. ამის შესახებ დღეს 20 იანვარს განათლების, მეცნიერების, კულტურისა და სპორტის მინისტრის მოადგილემ, შალვა გოგოლაძემ ტელეკომპანია იმედთან ისაუბრა.

"აღმოჩნდა, რომ არის საშუალება, არ მოხდეს ძველი სასახლის დემონტაჟი, არამედ აიგოს სრულიად ახალი 10 000 კაციანი დარბაზი, რომელიც ევრობასკეტის მოთხოვნებს სრულად დააკმაყოფილებს", — აღნიშნა გოგოლაძემ.

შალვა გოგოლაძის თქმით, 2021 წლის ევროპასკეტისთვის ახალი დარბაზის მშენებლობა ახალი სპორტის სასახლის გვერდით არსებულ მიწის ნაკვეთზე დაიწყება. მანამდე კალათბურთის ფედერაცია განიხილავდა, რომ ევრობასკეტისთვის არსებული სპორტის სასახლის რეკონსტრუქცია მომხდარიყო. ამის შესახებ 23 დეკემბერს კალათბურთის ფედერაციის პრეზიდენტმა პაატა გურასპაულმა ისაუბრა.

საქართველომ 2021 წლის ევრობასკეტის ჯგუფური ეტაპის მასპინძლობის უფლება 15 ივლისს, მიუნხენში გამართულ კალათბურთის საერთაშორისო ფედერაციის ევროპის კომიტეტის ასამბლეაზე მიიღო. ეს იმას ნიშნავს, რომ საქართველოს საკალათბურთო ნაკრები ავტომატურად მოიპოვებს ევროპის ჩემპიონატზე ასპარეზობის უფლებას, რომელიც ეროვნული ნაკრებისთვის მეხუთე ევრობასკეტი იქნება.