ქართული ოცნების წევრი და პარლამენტის დარგობრივი ეკონომიკის კომიტეტის თავმჯდომარე, რომან კაკულია ამბობს, რომ საქართველოს ვერც ერთი მმართველი ვერ იქნება აბსოლუტურად დამოუკიდებელი. მისი თქმით საქართველო არ არის ქვეყანა, რომელსაც შეიძლება დამოუკიდებელი მმართველი ჰყავდეს.

"დღეს საქართველოს ვერც ერთი მმართველი ვერ იქნება აბსოლუტურად დამოუკიდებელი. აქ ჩვენ მხოლოდ შეგვიძლია ვილაპარაკოთ ფარდობით დამოუკიდებლობაზე, ვინ შეიძლება იყოს ვისზე შედარებით დამოუკიდებელი. დავიწყოთ გამსახურდია, შევარდნაძე, ვინც გინდა ჩამოთვალეთ, ამ მოცემულობაში ჩვენ არ ვართ ბოლომდე მისული ქვეყანა, რომელსაც შეიძლება ჰყავდეს დამოუკიდებელი მმართველი, რომელიც მხოლოდ საკუთარი ინტერესებიდან გამომდინარე იმოქმედებს და უკომპრომისო იქნება. ეს გამორიცხულია", — თქვა რომან კაკულიამ TV პირველის ეთერში.

რომან კაკულიას თქმით, ქართველმა ხალხმა უნდა გაიგოს, რომ ადამიანები, რომლებიც სხვა ქვეყნის საელჩოებიდან "იტუმბებიან" იდეებით, ამ ქვეყანას არ გამოადგებიან.