პარლამენტთან მიმდინარე საპროტესტო აქციაზე აქტივისტ ნოდარ რუხაძის დაკავებისას დაპირისპირება მოხდა. სამართალდამცავები ძალის გამოყენებით ცდილობდნენ რუხაძის გაყვანას, რა დროსაც ის შეუძლოდ გახდა.

საზოგადოებრივი მაუწყებლის გადაღებულ კადრებში ჩანს, რომ აქტივისტები უხსნიან პოლიციას რუხაძის ჯანმრთელობის მდგომარეობის შესახებ და მის გათავისუფლებას ცდილობენ, თუმცა მას მაინც სვამენ მანქანაში.

შინაგან საქმეთა სამინისტროს განცხადებით, პარლამენტთან მიმდინარე აქციაზე წვრილმანი ხულიგნობისა და პოლიციისადმი დაუმორჩილებლობის ბრალდებით 9 პირი დააკავეს, თუმცა უწყებაში სახელებს არ აკონკრეტებენ. მოძრაობა #სირცხვილიას ინფორმაციით, დაკავებულებს შორის არიან აქტივისტები: ზუკა ბერძენიშვილი ბექა კოკაია, ნოდარ რუხაძე, ბექა ბასილია, ზურა მჟავანაძე და გიორგი მუმლაძე.

პოლიციასა და აქტივისტებს შორის პარლამენთან დაპირისპირება მას შემდეგ მოხდა, რაც მერიის სამსახურებმა კარვებისა და საპროტესტო ატრიბუტიკის აღება დაიწყეს და საბავშვო ატრაქციონები დაამონტაჟეს.

თბილისის მერიამ კარვების აყრა საახალწლოდ, 2018 წელსაც სცადა. მაშინ რუსთაველის გამზირზე აქციებს ზაზა სარალიძე და მალხაზ მაჩალიკაშვილი ატარებდნენ. სამოქალაქო აქტივისტების, ოპოზიციისა და არასამთავრობო ორგანიზაციების წინააღმდეგობის შემდეგ თბილისის მერიამ კარვების აყრა ვერ შეძლო, რუსთველზე კი უფრო მეტი კარავი გაიშალა. მერიას მოუწია საახალწლო ღონისძიებები პირველი რესპუბლიკის მოედანზე გადაეტანა.

გაიგეთ მეტი პარლამენტთან მიმდინარე დაპირისპირებაზე: