საქართველოში არსებული კონფესიების წარმომადგენლები, მწერლები და გამომცემლები ვაჟა გაფრინდაშვილის მხარდასაჭერად აქციას #თავისუფლებისსიგნალი უერთდებიან. ისინი მოუწოდებენ ყველას მსოფლიოსა და საქართველოს მასშტაბით, რომ 29 დეკემბერს, 19 საათზე დაასიგნალონ დატყვევებული ექიმის მხარდასაჭერად.

"ექიმის შემთხვევაში "ბრალის" დამძიმება განაპირობა მისი გამოხატვის თავისუფლებამ, მისმა პრინციპულმა აზრმა, რომ ის არ იზიარებდა ოკუპირებული რეჟიმის მიერ თავს მოხვეული საზღვრის იდეას.

ცხადია, სიგნალი სიმბოლურია, მაგრამ ამ სიმბოლოებს აქვს რეალური მნიშვნელობა და შედეგები, როდესაც ის მორალურ ღერძს ეყრდნობა. ჩვენი მორალური ღერძი ისტორიის ამ კონკრეტულ მონაკვეთში არის ვაჟა გაფრინდაშვილის სამოქალაქო აქტი", — აცახდებენ ისინი.

ექიმი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზე იმყოფება.