ქართული ოცნების დეპუტატი ირაკლი დაჩი ბერაია გამორიცხავს, რომ პროპაგანდისტულ გვერდებს, რომელიც ფეისბუქმა წაშალა მმართველი გუნდი მართავდა. ის ვარაუდობს, რომ ამ გვერდების უკან ნაციონალურ მოძრაობაზე განაწყენებულ ხალხი, მათ შორის ოცნების მხარდამჭერები და ბიზნესის წარმომადგენლები შეიძლება იდგნენ.

"თუ რომელიმე ფიზიკურ პირს ან კომპანიას სურვილი აქვს დააფინანსოს გვერდები, რომლებიც იქნება მიმართული დღევანდელი ოპოზიციის წინააღმდეგ, რომელიც წლების განმავლობაში ატერორებდა ბიზნესსა და ართმევდა ქონებებს, ეს ქართულ ოცნებას რატომ უნდა დავუკავშიროთ პირდაპირ ვერ ვხვდები", — განაცხადა მან.

On.ge-სთან საუბარში ბერაია ამბობს, რომ ფეისბუქის განცხადებაზე ინფორმაცია არ აქვს და დღის განმავლობაში პარტიის წევრებისგან არ მიუღია არანაირი ინფორმაცია ამ საკითხთან დაკავშირებით.

"მე ვერ გეტყვით, რომ ამ საკითხთან დაკავშირებით იყო რამე მსჯელობები და განხილვა, რადგან მსგავსს არ დავსწრებივარ. შეიძლება იყო და მოხდა უჩემოდ, ან არ იყო საერთოდ".

ამასთანავე, ის აცხადებს, რომ არ ფლობს ინფორმაციას ოცნების პიარსტრატეგიასთან დაკავშირებით, რადგან ამ საკითხში ვერ ერკვევა. დეპუტატი ამბობს, რომ თანაგუნდელებს მსგავს საკითხებზე არასდროს უსაუბრიათ.

"თუ მეკითხებით, შეხვედრებზე ვმსჯელობდით თუ არა კანონის დარღვევაზე, გპასუხობთ — არა".

ბერაია ამბოს, რომ ტროლებისა და ბოტების თავდასხმის მსხვერპლი თავადაც არაერთხელ ყოფილა.

"იცით რამდენი ტროლი და ბოტი მინახავს ჩემს ოფიცალურ გვერდზე, რომლებიც ყოველგვარი იდენტიფიცირების გარეშე უკიდურესად უწმაწური სიტყვებით მლანძღავენ და მაგინებენ მე, ჩემს ოჯახსა და ნათესავებს?... ამის შემდეგ რაზე მესაუბრებით, რომ ტროლები და ბოტები ყავს ქართულ ოცნებას და ეს 400 გვერდი, რომელიც დახურეს მხოლოდ ოცნების იყო და მარტო ქართული ოცნება არღვევს ამ ქვეყანაში წესებს და დანარჩენი ყველა პატიოსნად მუშაობს? — განაცხადა მან.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.