ქართული ოცნების წევრი, სოფო კილაძე არ ეთანხმება ამერიკელ სენატორ ჯიმ რიშს, რომ "მმართველი პარტია ოპოზიციას ებრძვის ძალადობრივი თავდასხმებით, დაკავებებით და შევიწროვების სხვა ფორმებით". მისი თქმით, სენატორს თავად რომ ენახა ოპოზიაცია როგორ "აბულნგებდა" უმრავლესობის წევრებს, სხვა პოზიცია ექნებოდა.

"ბატონ სენატორს თავად რომ ენახა ის ქმედებები, რასაც ოპოზიცია აკეთებდა — როგორ აბულინგებდნენ და ძალადობდნენ უმრავლესობის წევრებზე და როგორ დაიწყეს პარლამენტის ბლოკირება — ამ შემთხვევაში მისი პოზიცია სხვაგვარი იქნებოდა. ოპოზიცია შტურმს აპირებდა პარლამენტზე. აქ ხელისუფლება რა შუაშია", — განაცხადა სოფო კილაძემ.

ამერიკის სენატის საგარეო ურთიერთობათა კომიტეტის თავმჯდომარე ჯიმ რიში ამერიკის ხმასთან ინტერვიუში საქართველოში მიმდინარე მოვლენებს გამოეხმაურა. რიში აცხადებს, რომ ოპოზიციის წევრების პოლიტიკური დევნა "შემაშფოთებელია" და მმართველ გუნდს მოუწოდებს პოლიტიკური კრიზისიდან გამოსავალი იპოვოს.