საქართველოს ყოფილი პრეზიდენტი, მიხეილ სააკაშვილი ფეისბუკის პირად გვერდზე ეხმაურება სანდრა რულოვსის გადაწყვეტილებას, მეორე ტურიდან კანდიდატურის მოხსნის შესახებ:

"მე ერთხელ უკვე ვთქვი, რომ თითოეული კანდიდატის გადაწყვეტილებაა, მიიღებს თუ არა მონაწილეობას გაყალბებული არჩევნების მეორე ტურში. ყველას აქვს პირადი არჩევანის უფლება და მათ შორის სანდრამაც მიიღო გადაწყვეტილება, ჩემი ჩარევის გარეშე, საკუთარი სინდისის კარნახით. მე ამ გადაწყვეტილებას პატივს ვცემ, ისევე როგორც, სხვა კანდიდატების გადაწყვეტილებას იბრძოლონ მეორე ტურში და ვუსურვებ მათ წარმატებას. მე პატივს ვცემ ყველას და იმედი მაქვს, რომ ჩვენი აქტივისტები პატივისცემით მოეკიდებიან სანდრას პირად გადაწყვეტილებას, მით უმეტეს, რომ მან ძალიან ბევრი იბრძოლა ამ არჩევნებში და ზუსტად ვიცი, რომ არ შეეპუება გაყალბებასა და უსამართლობას. საერთოდ არ უნდა იცნობდეთ სანდრას, რომ იგი დაადანაშაულოთ, სხვისი, თუნდაც ჩემი, თავზე მოხვეული გადაწყვეტილებებით მოქმედებაში".

სააკაშვილის თქმით, დრო აჩვენებს ვინ იყო მართალი. ის დარწმუნებულია, რომ "ქართველი ხალხი გადალახავს ამ დროებით სიძნელეებს".

საქართველოს ყოფილმა პირველმა ლედიმ, სანდრა რულოვსმა გადაწყვიტა, რომ საპარლამენტო არჩევნების მეორე ტურში მონაწილეობა არ მიიღოს.

სანდრა რულოვსის თქმით, ის შეურაცხყოფად მიიჩნევს მეორე ტურში ბრძოლას.

ზუგდიდის 66-ე მაჟორიტარულ ოლქში სანდრა რულოვსმა მიიღო ხმების 45,71 პროცენტი, ედიშერ თოლორაიამ კი – 45,37%. სწორედ ამიტომ, მეორე ტურში ისინი უნდა დაპირისპირებოდნენ ერთმანეთს.

8 ოქტომბრის არჩევნების შემდეგ მეორე ტურში მონაწილეობის წინააღმდეგი იყო სანდრა რულოვსის ქმარი, მიხეილ სააკაშვილი, თუმცა, ნაციონალური მოძრაობის პოლიტსაბჭოზე უმრავლესობით მიიღეს გადაწყვეტილება, რომ მეორე ტურში ბრძოლა გაეგრძელებინათ და პარლამენტშიც შესულიყვნენ.