რუსეთის პრეზიდენტი, ვლადიმერ პუტინი აცხადებს, რომ ბერლინში მოკლული ზელიმხან ხანგოშვილის გადაცემა რუსეთისა და გერმანიის სპეცსამსახურების დონეზე განიხილებოდა. ყოველწლიურ დიდ პრესკონფერენციაზე მან ხანგოშვილი ტერორისტად მოიხსენია.

"პროკურატურის მხრიდან ნამდვილად არ ყოფილა, რადგან ჩვენმა კომპეტენტურმა ორგანოებმა მიიჩნიეს, რომ აზრი არ აქვს, რადგან უარყოფით პასუხს იღებდნენ", — განაცხადა პუტინმა.

საქართველოს მოქალაქე, პანკისელი ზელიმხან ხანგოშვილი გერმანიაში ველოსიპედით გამვლელმა მოკლა. იგი 23 აგვისტოს ლოცვაზე მიდიოდა, როდესაც თავში ესროლეს. ხანგოშვილის მკვლელობის ბრალდებით დააკავეს პირი, რომელსაც რუსეთის პასპორტი აღმოუჩინეს. ის ამ დრომდე დუმილის უფლებას იყენებს.

ზელიმხან ხანგოშვილმა საქართველო ორი წლის წინ დატოვა, მას შემდეგ, რაც 2015 წლის 28 მაისს, თბილისის ცენტრში, მირზა გელოვანის ქუჩაზე მძიმედ დაჭრეს. ხანგოშვილს მაშინ ოთხი ტყვია მოხვდა. გამოცემისვე ინფორმაციით, ხანგოშვილი ლაფანყურის სპეცოპერაციასაც უკავშირდება. ამასთანავე, ის რუსეთ-ჩეჩნეთის ომის მონაწილეა.

ხანგოშვილის მკვლელობის საქმის გამო ბერლინიდან რუსეთის საელჩოს ორი თანამშრომელი გააძევეს. როგორც გერმანიის საგარეო უწყების განცხადებაშია ნათქვამი, რომ რუსეთი ზელიმხან ხანგოშვილის საქმის გამოძიებაში არ თანამშრომლობს, რის გამოც საელჩოს ორი თანამშრომელი პერსონა ნონ გრატად გამოაცხადეს.

გერმანიის ქმედებების საპასუხოდ რუსეთმა ორი გერმანელი დიპლომატი გააძევა.

ამავე თემაზე: