სახელმწიფო ინსპექტორის სამსახურში მწვანე სკოლის პედაგოგის გამოკითხვა მიმდინარეობს. უკვე დასრულდა სკოლის დაცვის სამსახურის თანამშრომლისა და დირექტორის მოადგილის, მანანა ქაჯაიას გამოკითხვა. როგორც დირექტორის მოადგილე აცხადებს, მან გამოძიებას ინფორმაცია იმის შესახებ მიაწოდა, რაც წარწერების დატოვების შემდეგ სკოლაში ხდებოდა.

მისივე თქმით, წარწერებმა მათზე "დამთრგუნველი შთაბეჭდილება მოახდინა და გარკვეული ტიპის შიში" გაუჩინათ.

"მივიდნენ სკოლაში ბავშვები და თანამშრომლები და დახვდათ საშინელი სურათი, რომელმაც ძალიან დამთრგუნველი შთაბეჭდილება მოახდინა და გარკვეული ტიპის შიში, იმიტომ რომ ვერ მივხვდით რაში იყო საქმე და რა მესიჯები იყო. არ ვიცოდით იმ წარწერების მერე რამე იყო თუ არა სკოლაში", — განაცხადა მანანა ქაჯაიამ.

15 წლის მოზარდი გვიან ღამით თავისი ყოფილი სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო. მოზარდი, რომელიც დაკითხვის შემდეგ კორპუსიდან გადმოხტა, გუშინ, 17 დეკემბერს გარდაიცვალა.

მოზარდის გარდაცვალების საქმეზე გუშინ გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.