15 წლის ბიჭი, რომელიც დაკითხვის შემდეგ კორპუსიდან გადმოხტა, გარდაიცვალა. ინფორმაცია ამის შესახებ On.ge-ს იაშვილის კლინიკაში დაუდასტურეს. მას გული გაუჩერდა.

როგორც კლინიკაში განაცხადეს, პაციენტის შემოყვანისას მისი მდგომარეობა იყო უმძიმესი, დიაგნოზით სიმაღლიდან ვარდნა:

"6 დღის განმავლობაში კლინიკაში ჩატარდა ყველა საჭირო ინტერვენცია პაციენტის გადასარჩენად, სპეციალურად ამ პაციენტისთვის ისრაელის წამყვანი ჰოსპიტლიდან ჩამოვიდნენ ნეოროქირურგებისა და ანესთეზიოლოგების გუნდი, და ჩაერთნენ მკურნალობის პროცესში. სამწუხაროდ ჩატარებული ყველა ტიპის სამედიცინო ღონისძიებისა პაციენტის გადარჩენა ვერ მოხერხდა. დღეს მდგომარეობა დამძიმდა მოხდა გულის გაჩერება და 20:10 წუთზე დაფიქსირდა სიკვდილი".

15 წლის მოზარდი გვიან ღამით თავისი ყოფილი სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა. შემთხვევა 2019 წლის 11 დეკემბერს მოხდა.

"პოლიციელთა ფსიქოლოგიური ძალადობა და მუქარა იმდენად ინტენსიური და რეალური იყო, რომ არასრულწლოვანი შეუძლოდ გახდა გამოკითხვისას და მოითხოვა სამედიცინო დახმარების გაწევა, თუმცა აღნიშნული დახმარება მას არ აღმოუჩინეს. გამოკითხვის პროცესს ესწრებოდა არასრულწლოვნის დედაც, თუმცა გარკვეულ მომენტში არასრულწლოვანი მარტო დარჩა პოლიციის თანამშრომლებთან", — ნათქვამია საიას განცხადებაში, საპირისპიროს კი ირწმუნებიან შინაგან საქმეთა სამინისტროს პრესსამსახურში.

სახელმწიფო ინსპექტორის სამსახურმა პოლიციელების მხრიდან არასრულწლოვანის მიმართ ჩვენების მიცემის იძულების შესაძლო ფაქტზე გამოძიება სისხლის სამართლის კოდექსის 335-ე მუხლის პირველი ნაწილით დაიწყო. 2 სამართალდამცავს უფლებამოსილება დროებით შეუჩერდა.