საკრებულოში უმრავლესობის ყოფილი წევრი, ერეკლე კუხიანიძე ამბობს, რომ ორი დღის განმავლობაში ოკუპირებულ ცხინვალში გადასვლას ცდილობდა. მისი თქმით, სურს, რომ ვაჟა გაფრინდაშვილის გათავისუფლებაში წვლილი შეიტანოს და ოკუპირებული სამხრეთ ოსეთის დე ფაქტო პრეზიდენტს, ანატოლი ბიბილოვს რუსულად მიმართა.

"გუშინ ვცადე მე ეს განმეხორციელებინა, მაგრამ, ვითომ, რაღაც სხვა მიმართულებით გამიშვა და სადღაც ტყეში ვიბოდიალე და რაღაც მავთულხლართებში გავიჭედე. დღეს უკვე ეს ამბავი გახმაურდა და ახლა არ მინდა რაღაც ცირკს დაემსგავსოს, მაგრამ გამოუვალი ის მაქვს და გახმოვანდება ჩემი სურვილი. მინდოდა, მიმემართა ბატონი ბიბილოვისთვის", — თქვა ერეკლე კუხიანიძემ.

მედიასთან საუბრისას მან, ასევე, აღნიშნა, რომ ცხინვალი ოკუპანტებისთვის არა საქართველოს, არამედ სხვა ტერიტორიაა, ის არ შეურაცხყოფს მათ კანონებს და მტერსაც კი პატივს სცემს.

ქართული ოცნების გადაწყვეტილებით, ერეკლე კუხიანიძე თბილისის საკრებულოს უმრავლესობიდან გარიცხეს. რამდენიმე დღის წინ თბილისის საკრებულოს ქართული ოცნების წევრმა ერეკლე კუხიანიძემ საოკუპაციო რეჟიმის მიერ უკანონოდ დაკავებული ექიმი ვაჟა გაფრინდაშვილის ოჯახი პროვოკაციაში დაადანაშაულა და აგინა. მსგავსი შინაარსის კრიტიკული პოსტი კუხიანიძემ პირად ფეისბუქგვერდზე მას შემდეგ გამოაქვეყნა, რაც გაფრინდაშვილის ოჯახმა ოცნების ორგანიზებულ ღონისძიებაზე თქვა, რომ ზეიმის დრო არ არის. საკრებულოსთან ერეკლე კუხიანიძის გადადგომის მოთხოვნით აქცია გუშინ, 16 დეკემბერსაც გაიმართა. საკრებულოს თავმჯდომარემ აქტივისტებსა და ოპოზიციის წარმომადგენლებს უთხრა, რომ გუნდი გაივლიდა კონსულტაციებს და გადაწყვეტილებას მეორე დღეს გააცნობდნენ.