როგორი ნაძვის ხეებით ხვდებიან საქართველოს ქალაქები 2020 წელს

საახალწლო ორომტრიალის ცენტრალური ფიგურა — ნაძვის ხე საქართველოს ქალაქების უმეტეს ნაწილში უკვე ციმციმებს და ელოდება როდის გადაიღებენ მასთან ფოტოებს.

თბილისი

25 დეკემბერს თბილისში, პირველი რესპუბლიკის მოედანზე მილანიდან საგანგებოდ ჩამოტანილი მილიონიანი ნაძვის ხე საზეიმოდ აინთო. წარმომავლობისა და ფასის მიუხედავად ნაძვის ხემ დიდი კრიტიკა დაიმსახურა. მოქალაქეების ნაწილი ფეისბუქზე წერს, რომ ნაძვის ხე მეჩხერია, ტოტები აკლია და ფასის შესაბამისი არაა. ქალაქის მერი კი განმარტავს, რომ მსოფლიოში ახალი ტრენდია და ქვეყნები ცდილობენ, ცოცხალ ნაძვის ხესთან მიმსგავსებული საახალწლო ნაძვის ხეები დადგან.

გორი

საახალწლო ნაძვის ხე აინთო გორშიც, რომელიც ძალიან ჰგავს თბილისის 2019 წლის მთავარ ნაძვის ხეს. თუმცა, გორის მერი განმარტავს, რომ ქალაქში უკვე 15 წელია ერთი და იგივე ნაძვის ხე დგას, რომელსაც სხვადასსხვა განათებებით რთავენ. მისი თქმით, ანგელოზები თბილისის მერიისგან მიიღეს საჩუქრად, სხვა განათებები კი თავად შეიძინეს.

ბათუმი

კრიტიკას ვერ გადაურჩა ბათუმის ცენტრალური ნაძვის ხეც. მოქალაქეების ნაწილს ნაძვის ხის გაფორმება — ქოლგები არ მოსწონს. ნაწილი ფიქრობს, რომ ეს გაფორმება ტრიპოფობიის შიშს აძლიერებს.