პრემიერ-მინისტრი გიორგი გახარია 15 წლის მოზარდის გარდაცვალებასთან დაკავშირებით განცხადებას ავრცელებს და ამბობს, რომ მომხდარი ტრაგედიის პოლიტიკური მიზნით გამოყენების ყოველგვარი მცდელობა მიუღებელია.

მისივე თქმით, უმკაცრესად დაისჯება ყველა, ვისი მხრიდანაც რაიმე ტიპის დანაშაულის ჩადენა დადასტურდება.

"ღრმა მწუხარებას გამოვთქვამ 15 წლის ლუკა სირაძის ტრაგიკული გარდაცვალების გამო. პირველ რიგში, ყველამ ერთად უნდა გავაკეთოთ ყველაფერი, რომ ამ ტრაგედიასთან დაკავშირებთ არავის დარჩეს კითხვის ნიშნები. დამოუკიდებელი უწყების მიერ ჩატარებულმა გამოძიებამ პასუხის გარეშე არ უნდა დატოვოს არც ერთი კითხვა მომხდარ ფაქტთან დაკავშირებით. ამიტომ, ვავალებ როგორც შინაგან საქმეთა, ისე, განათლების სამინისტროებს, სრულად ითანამშრომლონ გამოძიებასთან, რომელიც აუცილებლად იქნება ღია და გამჭვირვალე", — განაცხადა გახარიამ.

როგორც პრემიერ-მინისტრი ამბობს, მოხდარში მთელი საზოგადოება ერთადაა პასუხისმგებელი. მისივე თქმით, მთავრობა იღებს სრულ პასუხისმგებლობას, რომ დააჩქაროს რეფორმა, რომელიც არასრულწლოვანთა მართლმსაჯულების, განათლების და ჯანდაცვის სფეროში არსებულ გამოწვევებს ეხება.

ასევე, გიორგი გახარიამ დავალები მისცა შინაგან საქმეთა, ჯანდაცვის, განათლებისა და იუსტიციის მინისტრებს, რომ დაუყონებლივ მიიღონ შესაბამისი ზომები და სისტემური ხარვეზების აღმოსაფხვრელი გეგმა წარმოადგინონ.

15 წლის ბიჭი, რომელიც დაკითხვის შემდეგ კორპუსიდან გადმოხტა, გუშინ, 17 დეკემბერს გარდაიცვალა.

გუშინ მოზარდის გარდაცვალების შემდეგ აქციები გაიმართა იაშვილის კლინიკასთანაც, სადაც მოქალაქეებმა თეთრი მიხაკები და სანთლები მიიტანეს. პარალელურად კი აქტივისტებმა შინაგან საქმეთა სამინისტროსთან და მწვანე სკოლასთან წარწერები — "ამ ცხოვრების დედაც!" დატოვეს.

მოზარდის გარდაცვალების საქმეზე გუშინ გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

შემთხვევა 2019 წლის 11 დეკემბერს მოხდა. მანამდე მოზარდი გვიან ღამით თავისი ყოფილი სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.