თბილისის საკრებულოში ქართული ოცნების დეპუტატი, ერეკლე კუხიანიძეს ჰგონია, რომ მის მიერ ოკუპირებულ ცხინვალში დაკავებული ვაჟა გაფრინდაშვილისა და მისი ოჯახის გინებაზე უარესი, მის მიმართ წამოსული კრიტიკა იყო.

"აღმოჩნდა, რომ ჩემ წინააღმდეგ წამოსული იყო იმისთანა სიბილწე, ჩემი ნათქვამი იმასთან შედარებით იყო ბავშვის ღუღუნი. ეს იყო რაღაც წარმოუდგენელი პათოლოგიური ნიაღვარი ზიზღის, გინების", — განაცხადა კუხიანიძემ TV პირველის ეთერში.

თბილისის საკრებულოს დეპუტატი ამტკიცებს, რომ მისი პოსტი გაფრინდაშვილის ოჯახის კრიტიკამ გამოიწვია, რადგან "სახელმწიფო ყველაფერს აკეთებდა იმისთვის, რომ ეს ადამიანი როგორმე გამოეხსნა ხლართებიდან".

"ვიღაცისთვის შეიძლება ეს არაფერს არ ნიშნავს, მაგრამ მე, როგორც ამ სიტუაციებში კარგად ჩახედული, ძალიან კარგად ვხედავ, რას ნიშნავს ეს დარტყმა ოცნებაზე, რომელიც ისედაც დასუსტებულია და განიცდის მუდმივ შეტევებს, სრულიად ზღვარგადასულ შეტევებს", — აცხადებს კუხიანიძე.

მისივე თქმით, თავისი პოსტი მან გვიან ღამით დაწერა, დილით კი უკვე შეცვალა. როგორც დეპუტატი ამბობს, საზოგადოებას თავისი პოზიციის შესახებ ერთ-ერთი გადაცემიდან გააცნობს.

ჟურნალისტის კითხვაზე აპირებს თუ არა ის ბოდიშის მოხდა ან საკრებულოს დატოვებას, კუხიანიძემ არ უპასუხა:

"ერთი მხრიდან მიდის საშინელი შეურაცხყოფა და იმაზე თქვენ რეაგირება ბევრ ჟურნალისტს საერთოდ არა აქვს, და რაღაც საშინელებები ხდება, და რა ხდება ამას ძალიან მალე, დღეს საღამოთი მექნება საუბარი".

დღეს, 16 დეკემბერს, თბილისის საკრებულოს შენობასთან სამოქალაქო მოძრაობის წევრები შეიკრიბნენ და ქართული ოცნების საკრებულოს დეპუტატის, ერეკლე კუხიანიძის გადადგომას მოითხოვენ. კუხიანიძემ საოკუპაციო რეჟიმის მიერ დაკავებული ექიმი ვაჟა გაფრინდაშვილის ოჯახი პროვოკაციაში დაადანაშაულა და აგინა. მსგავსი შინაარსის კრიტიკული პოსტი კუხიანიძემ პირად ფეისბუქგვერდზე მას შემდეგ გამოაქვეყნა, რაც გაფრინდაშვილის ოჯახმა ოცნების ორგანიზებულ ღონისძიებაზე თქვა, რომ ზეიმის დრო არ არის.

ფოტო: კადრი ეკრანიდან / ერეკლე კუხიანიძის FB