ჩვენ უკვე გაგაცანით თიბისის ბიზნეს დაჯილდოების ფინალისტები ოთხ კატეგორიაში: საუკეთესო პროდუქტის ან მომსახურების შექმნისათვის, საუკეთესო ინოვაციისთვის, სოციალური პასუხისმგებლობისთვის და თანამშრომლებზე განსაკუთრებული ზრუნვისთვის. დღეს კი ფინალისტების ბოლო სამეულზე უნდა გესაუბროთ.

საუკეთესო სტარტაპის კატეგორიაში გასამარჯვებლად ყურადღება ექცევა თანამედროვე ტექნოლოგიების გამოყენებას, ბრენდის უნიკალურობას, მომხმარებლებთან კომუნიკაციის სტილსა და ზრდის პოტენციალს.

საუკეთესო სტარტაპის კატეგორიის ჟიური ასე გამოიყურება:

ვახო ვახტანგიშვილი, მერი გიორგობიანი, ვალერი ჩეხერია, ლევან კილაძე, ზაალ გაჩეჩილაძე

1. Phubber

ციფრული პლატფორმა ფაბერი ვაჭრობისა და სოციალურ ქსელის ელემენტებს აერთიანებს. ონლაინ მაღაზიას მოქნილი ინტერფეისი, ინტეგრირებული განვადება, გადახდის დაცული სისტემა და უფასო მიტანის სერვისი აქვს. ფაბერზე უკვე 40 000-მდე ადამიანია რეგისტრირებული.

Phubber-ის აპლიკაციით შეგიძლიათ ხელმისაწვდომ ფასად იპოვოთ სასურველი სამოსი ან პირიქით, ფულის გამომუშავების მიზნით გაყიდოთ ნებისმიერი ნივთი. შესაძლებელია აუთლეტების, ვინტაჟური ნივთების, მეორადი და ავთენტური ბრენდული ტანსაცმლის განთავსება / შეძენა. ფაბერზე განთავსებულ ყოველ ნივთს ხარისხის კონტროლის მენეჯერი ამოწმებს და ეს ინფორმაცია პოტენციურ მყიდველს ნივთის ტრანზაქციამდე ეგზავნება.

"ჩვენი პლატფორმა მუდმივად განახლებადია, ამიტომ გადაწყვეტილებებს მომხმარებლებთან კომუნიკაციის გარეშე არ ვიღებთ. სოციალურ ქსელში გვაქვს ჯგუფი, სადაც აქტიურად ვუზიარებთ ერთმანეთს იდეებს", - ამბობს გიორგი ჩუგოშვილი, Phubber-ის თანადამფუძნებელი.

კომპანიაში ამაყობენ იმით, რომ გარემოზე ზრუნავენ და ტანსაცმლის ცირკულაციას უწყობენ ხელს.

2. Profy

პროფი არის პლატფორმა, რომელიც თქვენთვის საჭირო ხელოსანთან კომპიუტერის ან მობილური აპლიკაციის გამოყენებით დაგაკავშირებთ. გამჭვირვალე ფასები და კომენტარებზე დაფუძნებული სარეიტინგო სისტემა კი პროფის ერთ-ერთი მთავარი უპირატესობაა.

Profy-ს დახმარებით გამოცდილ ხელოსნებს მუდმივად ჰყავთ კლიენტები. პლატფორმა ბევრ ოსტატს აერთიანებს და სწორედ ამიტომ, მომსახურების მისაღებად ლოდინი დიდხანს არ გრძელდება.

"ვითვალისწინებთ როგორც მომხმარებლების ასევე შემსრულებლების აზრს. შესაბამისად, ყოველდღიურ რეჟიმში ვანახლებთ და ვაუმჯობესებთ ჩვენს სერვისს", - ამბობს ირაკლი ზანთარია, Profy-ს დამფუძნებელი.

მომავალში Profy-ს დალაგების სერვისიც დაემატება.

3. Tripcars

ავტომობილების გაქირავების პლატფორმა Tripcars 2019 წლის ივლისში შეიქმნა. ამ სერვისის დახმარებით ნებისმიერ ადამიანს შეუძლია მანქანა გააქირავოს ან იქირავოს. პლატფორმა მანქანის პატრონებისთვის დამატებითი შემოსავლის წყაროა, მოგზაურებისთვის კი - ტრანსპორტის პოვნის მოსახერხებელი მეთოდი.

ამ დროისთვის Tripcars-ზე 350-ზე მეტი ავტომობილია ხელმისაწვდომი.

"ადრე მანქანის გაქირავების პროცესი ასეთი იყო: მანქანას რომელიმე კომპანია იბარებდა და შემდეგ აქირავებდა, რაც სერვისს მნიშვნელოვნად აძვირებდა. ჩვენი საიტის დახმარებით კი ადამიანები ინდივიდუალურად აქირავებენ ავტომობილებს, პროცესი უფრო კომფორტულია და ფასიც დაბალი", - ამბობს ირაკლი ცაგარეიშვილი, Tripcars-ის დამფუძნებელი.

Tripcars-ის მანქანები დღიურად არიან დაზღვეულები, შესაბამისად, ავტომობილს არაფერი ემუქრება. სამომავლოდ კომპანია აზერბაიჯანის ბაზრის ათვისებაზე ფიქრობს.

გამარჯვებულის ვინაობას ამ და სხვა კატეგორიებში 17 დეკემბერს შევიტყობთ.

ბიზნეს დაჯილდოება უკვე მეოთხე წელია მიმდინარეობს და საზოგადოებას ყოველწლიურად აცნობს კომპანიების წარმატების ისტორიებს. მისი მიზანია ბიზნესის პოპულარიზაცია და იმ კომპანიების წახალისება, რომლებიც ხარისხიან ქართულ პროდუქტებს ქმნიან.