ქართული ოცნების დეპუტატის, მამუკა მდინარაძე საკუთარ განცხადებას გამოეხმაურა და თქვა, რომ ის სექსისტურ განცხადებებს არ აკეთებს.

"თურმე რა ყოფილა მთავარი ამბავი, რომ მდინარაძემ სექსისტური განცხადება გააკეთაო,, კაცები არ ჰყავთ მეთქი და ქალები გამოუშვეს რაღაც სპეცოპერაციის, თუ უნიჭო პერფორმანსი დაედგათ, რეებს ეძებენ, სად მიყვებიან, როდის იყო სექსისტურ განცხადებებს ვაკეთებდი", — თქვა TV პირველის ეთერში მამუკა მდინარაძემ.

ამ განცხადებამდე რამდენიმე წუთით ადრე, მამუკა მდინარაძემ მომხდარი სექსისტურად შეაფასა და თქვა, რომ უნიჭო და გოიმური პერფორმანსის დასადგმელად ქალები გამოუშვეს. მდინარაძის აზრით, ამ მდაბიო, თავხედურ პერფორმანსს ლელა ქებურიას და ირმა ნადირაშვილს #სირცხვილია "უპრავებს".

დღეს, 12 დეკემბერს, პარლამენტში პლენარული სხდომის დარბაზში სპეციფიური სუნის გამო შესვენება გამოცხადდა. ქართული ოცნების დეპუტატები ამბობდნენ, რომ ოპოზიციის ორმა წარმომადგენელმა უცნობი ნივთიერება დაასხა. სუნის გამო ცუდად გახდა დეპუტატი ენძელა მაჭავარიანი. პარლამენტში გამოიძახეს პოლიცია და სასწრაფო დახმარება. მოგვიანებით, სამოქალაქო მოძრაობა #სირცხვილიამ სხდომათა დარბაზში დაყენებული სუნის გამო პასუხისმგებლობა აიღო.

პარლამენტს დღეს უზენაესი სასამართლოს მოსამართლეთა სიისთვის კენჭი უნდა ეყარა.