მოძრაობა #სირცხვილიას ერთ-ერთი ლიდერი, შოთა დიღმელაშვილი ამბობს, რომ პარლამენტში გაშვებული ნივთიერება, რომელმაც სპეციფიკური სუნი დააყენა, არც ქიმიური და არც მომწამვლელია. როგორც მან On.ge-სთან აღნიშნა, ეს ერთგვარი ხუმრობა იყო.

"ჩვენ არც საშვი გვაქვს, არც საშვით არ გიშვებენ, ანუ აღმასრულებელი ჩვენგან არ ყოფილა. ნივთიერების სახელი ზუსტად არ ვიცი, მაგრამ გავიგებ", — აღნიშნა დიღმელაშვილმა.

დღეს, 12 დეკემბერს, პარლამენტში პლენარული სხდომის დარბაზში სპეციფიური სუნის გამო შესვენება გამოცხადდა. ქართული ოცნების დეპუტატები ამბობდნენ, რომ ოპოზიციის ორმა წარმომადგენელმა უცნობი ნივთიერება დაასხა. სუნის გამო ცუდად გახდა დეპუტატი ენძელა მაჭავარიანი. პარლამენტში გამოიძახეს პოლიცია და სასწრაფო დახმარება. მოგვიანებით, სამოქალაქო მოძრაობა #სირცხვილიამ სხდომათა დარბაზში დაყენებული სუნის გამო პასუხისმგებლობა აიღო.

პარლამენტს დღეს უზენაესი სასამართლოს მოსამართლეთა სიისთვის კენჭი უნდა ეყარა.