ქართული ოცნება "ევროპის საბჭოს თავმჯდომარეობისადმი მიძღვნილ ღონისძიებაზე" ევროპელ დიპლომატებს არ ეპატიჟება. როგორც კახა კალაძემ საგანგებო ბრიფინგზე განაცხადა, 14 დეკემბრის შეკრება პარტიული ღონისძიებაა და დიპლომატების მიწვევა მიზანშეწონილად არ მიაჩნიათ.

მმართველი პარტიის გენერალური მდივანი აცხადებს, რომ ღონისძიების მოწყობა ახალგაზრდული ფრთის ინიციატივა იყო და პოლიტიკურმა გუნდა მას მხარი დაუჭირა:

"ყველა რეგიონიდან ვიწვევთ ჩვენს მხარდამჭერებს. ვიწვევთ ქართული ოცნების კურსის და საქართველოს ევროპული მომავლის მხარდამჭერებს. საორგანიზაციო ჯგუფი უზრუნველყოფს ღონისძიებაზე დასწრების მსურველთა ტრანსპორტირებას საქართველოს ნებისმიერი რეგიონიდან".

ევროსაბჭოს თავმჯდომარეობისადმი მიძღვნილი შეკრება ქართული ოცნების ახალგაზრდულმა ფრთამ რამდენიმე დღის წინ დაანონსა. აღნიშნული ღონისძიება მმართველი გუნდის წინააღმდეგ გამართულ აქციებს დროში ემთხვევა.