საქართველოს პრეზიდენტს, სალომე ზურაბიშვილს სურს, რომ საზოგადოების ინფორმირებისთვის "ბედი ქართლისას" მსგავსი გამოცემა შეიქმნას. მან აღნიშნა, რომ ქართველები "დაკომპლექსებული ერი გავხდით" მაშინ, როცა უზარმაზარი შესაძლებლობები გვაქვს. ამის შესახებ პრეზიდენტმა გუშინ, 10 დეკემბერს საქართველოსა და კავკასიის შემსწავლელი მეცნიერებების საკოორდინაციო ცენტის დაფუძნებასთან დაკავშირებული შეხვედრაზე მეცნიერებთან ისაუბრა.

"აუცილებელია დაარსდეს, ხელახლა აღდგეს, შეიძლება არსებობდა ასეთი პერიოდული გამოცემები უცხოეთში, რომელიც გამოდიოდა ქართულ ენაზე. მე ვფიქრობ ბედი ქართლისა, მაგრამ შეიძლება სხვა ფორმით იყოს, მაგრამ გამოდიოდა ქართულ ენაზე და უცხო ენაზეც. დღევანდელ დღეს სერიოზული გამომცემლობა, რომელიც გადის ჩვენი საზღვრებიდან აღარ არის იმ დონეზე, რომ ყველა უნივერსიტეტში იყოს დარიგებული და ყველასთვის იყოს ხელმისაწვდომი", — თქვა სალომე ზურაბიშვილმა.

საქართველოსა და კავკასიის შემსწავლელი მეცნიერებების საკოორდინაციო ცენტის დაფუძნებასთან დაკავშირებულ შეხვედრაზე პრეზიდენტმა, ასევე, გააჟღერა ინიციატივა, რომ შეიქმნას პლატფორმა, სადაც ინფორმაციის გაცვლა, ძალების შეჯერება მოხდება. მისი თქმით, ის "ძალიან დიდი კულტურული და მეცნიერული საუნჯე", რომელიც გვაქვს არა მხოლოდ უნდა დავიცვათ, არამედ საზღვრებს გარეთ უნდა გავიტანოთ. პრეზიდენტს სურს, რომ გლობალიზაციის პერიოდში საქართველო არ დაიკარგოს.