გუშინ კინოსამყაროს ერთ-ერთი ყველაზე მნიშვნელოვანი დაჯილდოების, ოქროს გლობუსის ნომინანტთა ვინაობა გახდა ცნობილი.

სულ 25 ნომინაციაში დასახელებულ ათეულობით ფილმს, სერიალს, მსახიობსა და რეჟისორს შორის აშკარა ლიდერები გამოიკვეთა, რომლებმაც მოახერხეს და ყველაზე მეტი ნომინაცია მიიღეს.

სრულმეტრაჟიან მხატვრულ ფილმებს შორის უკონკურენტოდ ლიდერობს ნოა ბაუმბახის Marriage Story 6 ნომინაციით. ოჯახური დრამა, რომელშიც მთავარ როლებს სკარლეტ იოჰანსონი და ადამ დრაივერი ასრულებენ, ნეტფლიქსის პროდუქტია, რომლის პრემიერაც სულ ცოტა ხნის წინ შედგა.

Marriage Story

ფოტო: Netflix

ნოა ბაუმბახის ფილმს ორი საკულტო რეჟისორის 2019 წლის გახმაურებული ფილმები მოსდევს: მარტინ სკორსეზეს The Irishman და კვენტინ ტარანტინოს Once Upon a Time… in Hollywood. ორივე ფილმმა 5-5 ნომინაცია მიიღო.

Once Upon a Time in Hollywood

ფოტო: Sony Pictures Releasing

უყურადღებოდ არ დარჩენილა არც წლევანდელი კინოგაქირავების ტრიუმფატორი ფილმი Joker. ტოდ ფილიპსის ფილმი 4 ნომინაციით თითქმის ყველა მნიშვნელოვან ნომინაციაზეა წარდგენილი: იქნება ეს წლის საუკეთესო ფილმი თუ საუკეთესო რეჟისორი.

Joker

ფოტო: Warnes Bros.

აღსანიშნავია, რომ სამხრეთ კორეელი რეჟისორის, ბონგ ჯუნ-ჰოს კანის კინოფესტივალის ტრიუმფატორმა ფილმმა, Parasite-მა სამი ნომინაცია მოიპოვა: საუკეთესო უცხოენოვან ფილმთან ერთად ის საუკეთესო სცენარისა და რეჟისურის ნომინაციებშიცაა წარდგენილი, რასაც მსგავსი ტიპის დაჯილდოებაზე არაამერიკული კინოსურათები იშვიათად ახერხებენ.

Parasite

ფოტო: CJ Entertainment

რაც შეეხებათ სერიალებს, ამ მხრივ 4-4 ნომინაციით ლიდერობენ HBO-ს მინისერიალი Chernobyl და ნეტფლიქსის ორი სატელევიზიო შოუ — The Crown და Unbelievable.

საბოლოო მონაცემებით კი ნეტფლისი აღმოჩნდა სრული ლიდერი: 25 ნომინაციიდან 17 ნომინაციაში სწორედ ამ კომპანიის წარმოებული პროდუქტია წარდგენილი, მათ შორის ფილმებისა და სერიალების კატეგორიაშიც ყველაზე მეტი ნომინაციის მქონე ლიდერები სწორედ ნეტფლიქსთან თანამშრომლობით შეიქმნა.

ნეტფლიქსის შემდეგ HBO მოდის 15 ნომინაციით, რომლის საკულტო სერიალმაც, Game Of Thrones-ის ბოლო სეზონმა მხოლოდ ერთი, დრამატულ სერიალში საუკეთესო მსახიობი კაცის ნომინაცია მიიღო.

ასევე იხილეთ: